ხელოვნების მუშაკთა პროფკავშირის თავმჯდომარემ, დავით ოქიტაშვილმა საქართველოს პროფესიული კავშირების გაერთიანების თავმჯდომარის არჩევნებზე საკუთარი კანდიდატურა მოხსნა.
ამის შესახებ მან პროფკავშირების გაერთიანების ყრილობაზე სიტყვით გამოსვლისას განაცხადა.
ოქიტაშვილის თქმით, მის მიერ საკუთარი კანდიდატურის მოხსნა იმის მაგალითია, რომ მთავრობიდან არ იმართება.
„ჩემთვის მთავარი სკამი არ ყოფილა. მე იმ სკამზე დასკოჩილი არასოდეს ვყოფილვარ. ბედნიერი ვარ, რომ ვარ ხელოვნების პროფკავშირების თავმჯდომარე და მე ვარ ბედნიერი, რომ ვარ საქართველოს კულტურის პალატის პრეზიდენტი. მე მოვხსენი ჩემი კანდიდატურა, და დარწმუნდით რომ მთავრობა ჩემზე არ მუშაობდა“- განაცხადა ოქიტაშვილმა.
შეგახსენებთ, რომ დღეს საქართველოს პროფესიული კავშირების გაერთიანების ყრილობა იმართება, სადაც დეპუტატები ახალ თავმჯდომარეს აირჩევენ. არჩევნებში მონაწილე უკვე ორი კანდიდატი დარჩა: გაერთიანების მოქმედი თავმჯდომარე ირაკლი პეტრიაშვილი და ენერგეტიკის მუშაკთა პროფკავშირის თავმჯდომარე ამირან ზენაიშვილი. ფარული კენჭისყრის პროცესში სულ მალე დაიწყება.