მესტიაში დღეს უხვი ნალექი იყო, რამაც მდინარეების - მესტიაჭალა, მულხურა და დოლრაჭალის ადიდება გამოიწვია. სტიქიამ მუნიციპალიტეტის ინფრასტრუქტურა დააზიანა. მესტია-ჯახუნდერის მაღალი ძაბვის ელექტროგადამცემი ხაზებისა და ბოძების დაზიანების საფრთხის გამო ჩატარდა სამუშაოები რის გამოც ელექტროენერგიის მიწოდება არ შეფერხებულა. ადიდებულმა მდინარემ ორ ადგილას სასმელი წყლის მილები დააზიანა. ამ დროისთვის მესტიის მოსახლეობას წყალი ალტერნატიული წყაროებიდან მიეწოდება. მუნიციპალიტეტში წაღებულია 5 ხიდი - 2 მულახში, 2 ბეჩოში და 1 ლენჯერში. დატბორილია ბეჩოს თემის სოფელ მაზერის მინდვრები და სათიბები.

რეგიონული განვითარების სამინისტროს ინფორმაციით, დოლრაჭალის მიმდებარედ გზის სარეაბილიტაციო სამუშაოები მიმდინარეობდა, მოვარდნილმა წყალმა დაუმონტაჟებელი გაბიონები წაიღო. წაღებულია ასევე სოფელ ჭოლაში მისასვლელი გზის 400 მეტრიანი მონაკვეთი სადაც მძიმე ტექნიკა იწყებს მუშაობას, რათა მდინარეს კალაპოტი შეუცვალოს.

პერიოდულად იტბორება მესტიის ცენტრალური გზა, სადაც მძიმე ტექნიკის მუდმივი მუშაობის შედეგად მანქანების მოძრაობა არ შეზღუდულა.