საქართველოს დამოუკიდებლობის დღისადმი მიძღვნილი სამხედრო აღლუმი ქუთაისში დასრულდა.
სამხედრო აღლუმი საქართველოს სახელმწიფო ჰიმნით გაიხსნა, რომელიც მომღერალმა ანა ხანჩალიანმა თავდაცვის სამინისტროს სასულე ორკესტრთან ერთად შეასრულა.
ჰიმნის შემდეგ, თავდაცვის ეროვნული აკადემიის კურსდამთავრებულებმა ფიცი საზეიმოდ დადეს.
აღლუმზე წუთიერი დუმილით პატივი მიაგეს ქვეყნის ერთიანობისა და სამსახურეობრივი მოვალეობის შესრულების დროს დაღუპულთა ხსოვნას.
სამხედრო აღლუმი პრეზიდენტმა, ქვეყნის უმაღლესმა მთავარსარდალმა მიხეილ სააკაშვილმა ჩაიბარა.
აღლუმის მონაწილეებს საქართველოს შეიარაღებული ძალების გაერთიანებული შტაბის უფროსი გენერალ-მაიორი დევი ჭანკოტაძე მიესალმა.
სამხედრო აღლუმი მედროშეებმა გახსნეს, რომელთაც წინ გაერთიანებული შტაბის უფროსის მოადგილე პოლკოვნიკი არსენ ცუხიშვილი მიუძღოდათ.
მედროშეებს კადეტთა სამხედრო ლიცეუმის მსმენელები მოჰყვნენ. კადეტების შემდეგ, საზეიმო მსვლელობა თავდაცვის ეროვნული აკადემიის მსმენელებმა განაგრძეს, შემდეგ კი - გაერთიანებული შტაბის სახმელეთო ჯარებისა და საავიაციო ქვედანაყოფების პირადი შემადგენლობისგან დაკომპლექტებულიმა სააღლუმე ნაწილებმა.
საზეიმო მსვლელობაზე სახმელეთო ჯარების ქვედანაყოფები გამოვიდნენ, მათ შორის იყვნენ - I, II, III, IV და V ქვეითი ბრიგადა, მსუბუქ ქვეითთა ბატალიონი, სამთო-სადაზვერვო ბატალიონი და სპეციალური ოპერაციების ძალები.
აღლუმის საზეიმო შემადგენლობაში იყვნენ, საარტილერიო ქვედანაყოფების სამხედრო მოსამსახურეები.
ქვეითთა საზეიმო მსვლელობა შეიარაღებული ძალების გაერთიანებული შტაბის სამხედრო პოლიციის დეპარტამენტის პირადმა შემადგენლობამ დაასრულა.
მათ შემდეგ მოედანზე შეიარაღებული ძალების მძიმე ჯავშანტექნიკა და საარტილერიო სისტემები გამოვიდნენ.
აღლუმის საზეიმო მსვლელობაში პირველად მონაწილეობა მუხლუხოებიანმა ქვეითთა საბრძოლო მანქანა „ლაზიკამ“ და „დიდგორი 3-მა“ მიიღეს.
წარმოდგენილი იყო უპილოტო საფრენი აპარატი და ზალპური ცეცხლის რეაქტიული სისტემა.
აღლუმის დასასრულს ქუთაისს შვეულმფრენებმა გადაუფრინეს, მანევრული ფრენა შეასრულეს და ბრჭყვიალა ფერადი ფურცლები ჩამოყარეს.
სამხედრო აღლუმი მოიერიშე სუ-25-ებმა დაასრულეს, რომელთაც ცაზე ქართული დროშის ფერი - თეთრი და წითელი კვალი დატოვეს.
თავდაცვის სამინისტროს ინფორმაციით, აღლუმში საქართველოს შეიარაღებული ძალების, თითქმის ყველა ქვედანაყოფი, სულ კი, 5 000 სამხედრო მოსამსახურე მონაწილეობდა.
აღლუმი დაახლოებით 18:00 საათზე დაიწყო და 45-50 წუთს გაგრძელდა.