ნატო-ს "პარტნიორობა მშვიდობისთვის" პროგრამის ფარგლებში ბაკურიანში 3 კვირიანი საერთაშორისო სამთო სწავლება დასრულდა.
სამთო მომზადების ზამთრის კურსი ნატო-ს წევრი და პარტნიორი ქვეყნების - ესტონეთის, ლატვიის, უკრაინის, საქართველოსა და სომხეთის 11-მა სამხედრო მოსამსახურემ გაიარა.
თავდაცვის სამინისტროს პრესსამსახურის ინფორმაციით, საჩხერის სამთო სკოლის ინსტრუქტორებმა მონაწილეებს თხილამურებით დაბრკოლებათა ზოლის გადალახვა, ზვავში მოყოლილი ადამიანის ძებნა, ევაკუაციის ტექნიკური მეთოდები და თავშესაფრის ე.წ. "იგლუს" მოწყობა შეასწავლეს.
სწავლებაში მონაწილე სამხედრო მოსამსახურეებს შესაბამისი სერტიფიკატები გადაეცათ.
სწავლების დასრულების საზეიმო ცერემონიას საქართველოში ნატო-ს სამეკავშირეო ოფისის უფროსი უილიამ ლაჰიუ და დიპლომატიური კორპუსის სხვა წარმომადგენლები დაესწრნენ.

















