თავდაცვის მინისტრობის კანიდატი ირაკლი ალასანია თავდაცვის უწყებაში ძირეული ცვლილებების განხორცილებას გეგმავს.

მისი თქმით, პირველივე დღიდან თავდაცვის სამინისტრო ჯარისკაცებზე ზრუნვას დაიწყებს და ყველა პირობას შექმნის, რათა ჯარისკაცმა საკუთარი ქვეყნის დაცვა შეძლოს.

„ჩვენი მთავარი ღირებულება იქნება ჯარისკაცი. ეს აქამდე ასე არ იყო. აბსოლუტური უპასუხისმგებლობა იყო დამკვიდრებული თავდაცვის მთელს სისტემაში. აქედან გამომდინარე, სერიოზული, ძირეული ცვლილებები იქნება განსახორციელებლი“ - განაცხადა ალასანიამ და დასძინა, რომ თავდაცვის სამინისტრო მჭიდროდ ითანამშრომლებს საპარლამენტო კომიტეტთან.

ალასანიას თქმით, ასევე, მისი ერთ-ერთი მთავარი ამოცანა იქნება, შეიარაღებულ ძალებზე სამოქალაქო კონტროლისა და საპარლამეტო ზედამხედველობის გაზრდა.

მისივე თქმით, უნდა შეიცვალოს ჯარისკაცებისა და თანამშრომლების მიმართ არასათანადო მოპყრობაც.

როგორც ალასანიამ აღნიშნა, მსგავს საკითხებს სამხედრო პოლიცია დაამუშავებს და დამნაშავეს დასჯის.

მისი თქმით, ამასთან შეიქმნება სამხედრო ომბუდსმენის თანამდებობაც.