საქართველოს თავდაცვის მინისტრმა ჯუანშერ ბურჭულაძემ ტელეკომპანია „რუსთავი 2“-ის ეთერში თავდაცვის ძალების მზადყოფნის გაძლიერების მიზნით განხორციელებულ და დაგეგმილ სიახლეებზე ისაუბრა. მისი განცხადებით, ძირითადი აქცენტი შესაძლებლობების განვითარებაზე კეთდება და ასევე, აქტიურად მიმდინარეობს მოლაპარაკებები თანამედროვე შეიარაღების შესყიდვის შესახებ. როგორც ჯუანშერ ბურჭულაძემ აღნიშნა, 2020 წელს საქართველოს საჰაერო თავდაცვითი შესაძლებლობების გაძლიერებისა და განვითარების მიზნით, თავდაცვის სამინისტროსა და ისრაელის სახელმწიფო კომპანია "რაფაელს" შორის შეთანხმება გაფორმდა, რომლის თანახმად, საჰაერო თავდაცვით დანადგარებს სრული აღდგენა და მოდერნიზაცია ჩაუტარდება. „2020 წელს ხელშეკრულება დაიდო ისრაელის ერთ-ერთ მსხვილ კომპანია „რაფაელთან“ და სრული აღდგენა და მოდერნიზაცია უკვე დაწყებულია. ჩვენ პროდუქტს მიმდინარე წლის ბოლომდე მივიღებთ“, - განაცხადა ჯუანშერ ბურჭულაძემ.

ჯუანშერ ბურჭულაძის განცხადებით, აქტიურად მიმდინარეობს პარტნიორებთან მუშაობა დრონების ერთობლივ წარმოებაზე: „მე პირადად გახლდით ერთი თვის წინ ვიზიტით პოლონეთში და ჩეხეთში. ჩვენ ვმუშაობთ პარტნიორებთან დრონების ერთობლივ წარმოებაზე და სხვადასხვა შეიარაღებაზე, რაც უახლოეს მომავალში მივა შედეგამდე“.

თავდაცვის მინისტრის თქმით, მიმდინარეობს მუშაობა დამატებით ტანკსაწინააღმდეგო სისტემების „ჯაველინების“ შესყიდვასთან დაკავშირებით. „ვიმუშავეთ ჩვენს პარტნიორებთან „ჯაველინების“ შეძენაზე, შევიძინეთ M4-ები, “დელტაში” აღვადგინეთ 2010 წელს დაწყებული წარმოება, რომელიც აკვანშივე ჩაიკლა სხვადასხვა მიზეზების გამო. ჩვენ ამ პროცესსაც გავმართავთ და სავარაუდოდ მიმდინარე წლის ბოლომდე გვექნება ადგილობრივი წარმოება”, -აღნიშნა თავდაცვის მინისტრმა.

მინისტრმა თავდაცვის ძალების განვითარების გეგმებზეც ისაუბრა და აღნიშნა, რომ 10 დღის წინ გამოიცა „თავდაცვის სტრატეგიული მიმოხილვის დოკუმენტი“, რომელიც განსაზღვრავს თავდაცვის სამინისტროსა და თავდაცვის ძალების შესაძლებლობების განვითარების მიმართულებებს კონკრეტული პერიოდისთვის, ხოლო მეორე დოკუმენტში 2020-2030 წლის გეგმებზეა საუბარი.