დავით აღმაშენებლის სახელობის ეროვნულ თავდაცვის აკადემიაში ახალი სასწავლო წლის დაწყებისადმი მიძღვნილი საზეიმო ღონისძიება გაიმართა.

აკადემიის პირველი და მეორე კურსის მსმენელებს სწავლის დაწყება საქართველოს თავდაცვის მინისტრმა დიმიტრი შაშკინმა პირადად მიულოცა.

იგი ეროვნული თავდაცვის აკადემიაში სასწავლო პროცესის დაწყებას უშუალოდ გაეცნო. საზეიმო ღონისძიება საქართველოს სახელმწიფო ჰიმნით გაიხსნა, რომელიც თავდაცვის სამინისტროს სამხედრო ორკესტრმა შეასრულა. სახელმწიფო ჰიმნის შემდეგ, აკადემიის მსმენელებმა და სტუმრებმა წუთიერი დუმილით პატივი მიაგეს საქართველოს ერთიანობისთვის ბრძოლის დროს დაღუპულ ქართველ სამხედრო მოსამსახურეებს.

დღეიდან აკადემიის ბაკალავრიატის პირველი კურსის მსმენელები 5 კვირიან საწყის საბრძოლო მომზადების კურსს გაივლიან.

საქართველოს თავდაცვის სამინისტროს ინფორმაციით, ეროვნულ თავდაცვის აკადემიაში სწავლას სახელმწიფო სრულად ანაზღაურებს.

თავდაცვის სამინისტროში აცხადებენ, რომ აკადემიის მსმენელები უზრუნველყოფილნი არიან თანამედროვე სტანდარტების შესაბამისი მატერიალურ-ტექნიკური ბაზით, საცხოვრებელი ადგილით, კვებით, უნიფორმით, სამედიცინო მომსახურებით.

აკადემიის კურსდამთავრებული ბაკალავრის ხარისხს და ლეიტენანტის სამხედრო წოდებას მიიღებს. აკადემია მოამზადებს ოფიცრებს ქვეითი, საინჟინრო, ლოგისტიკის, სატანკო, მექანიზირებული, არტილერიის, ავიაციის, საჰაერო თავდაცვის და კავშირგაბმულობის სპეციალიზაციით.

აკადემიაში ჩაბარების შემდეგ, მსმენელები თავდაცვის სამინისტროსთან 10-წლიან ხელშეკრულებას აფორმებენ, რომელიც 4-წლიან სწავლებასა და 6-წლიან სამხედრო საკონტრაქტო სამსახურს ითვალისწინებს.