მიმდინარე წლის 24-25 ოქტომბერს ბრიუსელი ნატოს თავდაცვის მინისტერიალს მასპინძლობს. ალიანსის შტაბბინაში დაგეგმილ შეხვედრებამდე ირაკლი ღარიბაშვილმა კომენტარი გააკეთა, სადაც მან ნატო-საქართველოს წარმატებულ თანამშრომლობას გაუსვა ხაზი და ნატოში ინტეგრაციის გზაზე საქართველოს სწრაფვასთან დაკავშირებით აღნიშნა, რომ ჩვენი ქვეყანა ნატოსთან ერთად დასახულ ყველა გეგმას და რეფორმას პირნათლად ასრულებს.
მინისტერიალის ფარგლებში საქართველოს თავდაცვის მინისტრი ნატოს გენერალურ მდივან იენს სტოლტენბერგს შეხვდება, სადაც მხარეები ნატო-საქართველოს თანამშრომლობის მექანიზმებს განიხილავენ. „ეს იქნება ჩემი პირველი შეხვედრა ბატონ სტოლტენბერგთან მას შემდეგ, რაც თავდაცვის მინისტრის თანამდებობაზე დავინიშნე. ჩვენ ძალიან კარგად ვიცნობთ ერთმანეთს. 5 წლის წინ ერთობლივად გავხსენით ნატო-საქართველოს წვრთნებისა და შეფასების ერთობლივი ცენტრი (JTEC) საქართველოში. ერთ-ერთი მნიშვნელოვანი საკითხი, რასაც ჩვენ შეხვედრის დროს შევეხებით, ნატო-საქართველოს არსებითი პაკეტის კიდევ უფრო გაძლიერება და ჩვენი ურთიერთობის სხვა ეტაპზე გადასვლა იქნება“, - განაცხადა საქართველოს თავდაცვის უწყების ხელმძღვანელმა.

ალიანსის შტაბბინაში საქართველოს თავდაცვის მინისტრი „მტკიცე მხარდაჭერის“ მისიის ფორმატში ნატოს წევრი და პარტნიორი ქვეყნების თავდაცვის მინისტრების წინაშე სიტყვით გამოვა და გლობალურ უსაფრთხოების უზრუნველყოფის მნიშვნელობასა და მასში საქართველოს წვლილზე ისაუბრებს. „საქართველო ნატოს ქვეყნების ყველაზე გამორჩეული, ძლიერი და სანდო პარტნიორია. ჩვენ ავღანეთში ძალიან ღირსეულად და ძლიერად ვართ წარმოდგენილი. ჩვენი გმირი სამხედროები ნატოს წევრი ქვეყნების ჯარისაცების მხარდამხარ იბრძვიან და წვლილი შეაქვთ გლობალური უსაფრთხოების სფეროში. მინდა, კიდევ ერთხელ ხაზგასმით აღვნიშნო, რომ ნატოს ყველა წევრი ქვეყანა ჩვენი ქვეყნის და ჩვენი სამხედროების მიმართ ერთხმად აღიარებს ძალიან დიდ მხარდაჭერას და გვერდში დგომას. სწორედ, ერთ-ერთი მთავარი მიზეზი, რის გამოც საქართველოს ასეთი მაღალი სტატუსი აქვს მთელს საერთაშორისო არენაზე, ჩვენი სამხედროების დამსახურებაა“, - აღნიშნა ირაკლი ღარიბაშვილმა.

მინისტერიალის ფარგლებში ირაკლი ღარიბაშვილი უცხოელ კოლეგებსაც შეხვდება და თავდაცვის სფეროში ორმხრივი თანამშრომლობის საკითხებზე ფინეთის, პოლონეთის, გერმანიის, შვედეთისა და გაერთიანებული სამეფოს თავდაცვის მინისტრებთან იმსჯელებს.