საქართველოს თავდაცვის მინისტრი დიმიტრი შაშკინი გერმანიაში ამერიკის შეერთებული შტატების სამხედრო ბაზა „ჰოჰენფელსს“ ეწვია.

თავდაცვის სამინისტროს ინფორმაციით, შეერთებული შტატების გაერთიანებულ მრავალეროვანი მზადყოფნის ცენტრში (JMRC), ამაჟამად ISAF-ის მისიისთვის საქართველოს III ქვეითი ბრიგადის 32-ე ბატალიონის და I ქვეითი ბრიგადის მე-12 ბატალიონის სამხედროები მოსამზადებელ წვრთნას გადიან.

შაშკინს „ჰოჰენფელსის“ საწვრთნელ ბაზაზე აშშ-ის ევროპის სარდლობის დაგეგმვის, პოლიტიკისა და სტრატეგიის დირექტორის მოადგილემ კონტრადმირალმა მარკ მონტგომერიმ უმასპინძლა.

ამერიკელმა პარტნიორებმა დიმიტრი შაშკინს და საქართველოს შეიარაღებული ძალების გაერთიანებული შტაბის ხელმძღვანელობას ქართველი სამხედროების მომზადების პროცესის დეტალური სქემა წარუდგინეს.

თავდაცვის მინისტრი ბაზაზე ამერიკელი სამხედროების მიერ ქართველი ჯარისკაცების წვრთნის პროცესსაც დაესწრო.