ბათუმში, სასტუმრო „ჰილტონში“ თავდაცვისა და უსაფრთხოების კონფერენცია გრძელდება. ღონისძიების მეორე ნაწილი, რომელსაც გაერთიანებული სამსახურების სამეფო ინსტიტუტი (RUSI) მასპინძლობს, ტოტალური თავდაცვის საკითხების განხილვას დაეთმო.
თავდაცვის სამინისტროს ინფორმაციით, პანელის სპიკერებმა ტოტალური თავდაცვის კონცეპტუალურ პრინციპებზე, მიზნებზე და გამოწვევებზე ისაუბრეს და სხვადასხვა ქვეყნების გამოცდილება განიხილეს. პანელს RUSI-ს ასოცირებული დირექტორი ჯონათან ეიალი უძღვებოდა, რომელმაც ტოტალური თავდაცვის ევოლუცია მიმოიხილა.
თავდაცვის უწყებას მინისტრის პირველი მოადგილე ლელა ჩიქოვანი და გენერალური შტაბის უფროსი, გენერალ-მაიორი ვლადიმერ ჩაჩიბაია წარმოადგენდნენ.

ლელა ჩიქოვანმა კონფერენციის მონაწილეებს საქართველოს ტოტალური თავდაცვის კონცეფცია გააცნო, რომელიც 4 - ფსიქოლოგიური, სამხედრო, სამოქალაქო და ეკონომიკური ელემენტებისგან შედგება. მისი განცხადებით, ტოტალური თავდაცვის ძირითადი საფუძველი უწყებათშორისი თანამშრომლობის მექანიზმია, რაც არსებული შეზღუდული რესურსების ეფექტურ გადანაწილებას უზრუნველყოფს. ახალი კონცეფციის შემუშავებისას მან ყურადღება სკანდინავიისა და ბალტიისპირეთის ქვეყნებისგან მიღებულ გამოცდილებაზე გაამახვილა. დისკუსიისას მინისტრის პირველმა მოადგილემ ასევე, იმ მექანიზმებზე ისაუბრა, რასაც ნატო არსებითი პაკეტის ფარგლებში საქართველოს თავდაცვისა და უსაფრთხოების სექტორს სთავაზობს. აღნიშნული კონცეფცია მთავრობის დამტკიცების შემდეგ სამოქალაქო საზოგადოების წარმომადგენლებს წარედგინება. გენერალ-მაიორმა ვლადიმერ ჩაჩიბაიამ სისტემის დანერგვისთვის საჭირო რესტრუქტურიზაციის პროცესზე გაამახვილა ყურადღება, რის შედეგადაც მართვისა და კონტროლის სისტემები გაუმჯობესდა.

უწყების ცნობით, ფინეთის თავდაცვის სამინისტროს წარმომადგენელმა შარლოტა ქოლენმა ტოტალური თავდაცვის შვედურ მოდელზე ისაუბრა, რომელიც მთავრობის, არასამთავრობო ორგანიზაციების, ბიზნესის და მოქალაქეების მჭიდრო თანამშრომლობაზეა დაფუძნებული. მისი განცხადებით, ტოტალური თავდაცვის მიდგომა ჰიბრიდული გამოწვევების წინააღმდეგ ფინეთის პასუხია. ჰიბრიდულ საფრთხეებზე გაამახვილა ყურადღება ლატვიის თავდაცვის მინისტრმა რაიმონდს ბერგმანისმაც. პანელზე ვიდეოკონფერენციის საშუალებით RUSI-ს მკვლევარი იგორ სუტიაგინი ჩაერთო, რომელმაც ისაუბრა რუსეთის მთავრობის პოლიტიკურ მიზნებზე და სურვილზე, აღადგინოს გავლენა პოსტ-საბჭოთა სივრცეზე, მათ შორის საქართველოზე. მისი თქმით, ამისთვის რუსეთი მის ხელთ არსებულ ეკონომიკურ, დიპლომატიურ, საინფორმაციო საშუალებებს იყენებს, ხოლო რუსეთის მიდგომა - ტოტალური აგრესია - გვავალდებულებს ტოტალური თავდაცვის კონცეფცია გვქონდეს.