საქართველოს სახალხო დამცველის რწმუნებულებმა, 29 ივნისს ყვარლის რაიონის დროებითი მოთავსების იზოლატორში ადმინისტრაციულ პატიმრობაში მყოფი, პოლიტიკური კოალიცია „ქართული ოცნების“ ახმეტის რაიონული ოფისის ხელმძღვანელი, ზაქარია ქინქლაძე მოინახულეს.
სახალხო დამცველის პრესსამსახურის ინფორმაციით, პატიმრის მონახულებას წინ უსწრებდა, რამდენიმე ინტერნეტ გამოცემის მიერ გავრცელებული ინფორმაცია იმის შესახებ, რომ პატიმარს არ მიეწოდებოდა საკვები პროდუქტები და პირადი ჰიგიენის ნივთები.
მათივე ინფორმაციით, სახალხო დამცველის წარმომადგენლები პირადად შეხვდნენ ზაქარია ქინქლაძეს, რომლის მდგომარეობა დროებითი მოთავსების იზოლატორში დამაკმაყოფილებელად შეიძლება შეფასდეს.
„ზაქარია ქინქლაძეს არ გააჩნია პრეტენზიები იზოლატორში არსებული პირობებისა და მოპყრობის მხრივ. მისივე თქმით, მას არა აქვს პრობლემები საკვების მიწოდებასთან დაკავშირებით, საკვები დროულად და ზედმეტი რაოდენობითაც კი მიეწოდება. როგორც პატიმარმა განაცხადა ერთადერთი გაუგებრობა შეიქმნა ძვლოვანი საკვების შეტანისას, თუმცა ინციდენტი მალევე ამოიწურა და ამის გამო მას საკვების ნაკლებებობა არ ჰქონია. პატიმარის სანიტარული მდგომარეობა დროებითი მოთავსების იზოლატორში დამაკმაყოფილებელია. მისი განცხადებით საჭიროებისამებრ აქვს წვდომა წყალთან და ხსენებულ საკითხებთან დაკავშირებით დროებითი მოთავსების იზოლატორის მიმართ პრეტენზია არ გააჩნია. ასევე არ აქვს ამანათების გადაცემასთან დაკავშირებული პრობლემა.“-ნათქვამია სახალხო დამცველის ვებ-გვერდზე გამოქვეყნებულ განცხადებაში.
კოალიცია „ქართული ოცნების“ ახმეტის რაიონული ოფისის ხელმძღვანელი, ზაქარია ქინქლაძე სამართალდამცავებმა რამდენიმე დღის წინ დააკავეს. მას 25 დღიანი ადმინისტრაციული პატიმრობა აქვს მისჯილი.