საქართველოში მოქმედი 11 არასამთავრობო ორგანიზაცია „შეაჩერე კორუფცია“-ს ბრალდებებს პასუხობს და განცვხადებას ავრცელებს, რომელსაც საინფორმაციო სააგენტო „ნიუსპრესი“ უცვლელად გთავაზობთ:

„უკანასკნელ ხანებში ზოგიერთი არასამთავრობო ორგანიზაცია უსაფუძვლო თავდასხმებს ახორციელებს და მიზანმიმართულ კამპანიას ეწევა არასამთავრო ორგანიზაციების წარმომადგენლების ცნობადი სახეების ღისებისა და პატივის შელახვის მიზნით, რაც მიუღებელია საზოგადოებრივ სექტორში მომუშავე ორგანიზაციებისთვის.
საქმე ეხება, ორგანიზაციის „შეაჩერე კორუფცია“-ს მიერ გავრცელებულ ინფორმაციას სასჯელაღსრულებისა და პრობაციის სამინისტროში გამართულ ტენდერებში არასამთავრობო ორგანიზაციისა „ქალი და ბიზნესი“ და სასჯელაღსრულების სამინისტროს ხელმძღვანელობის კორუფციულ სქემებში დადანაშაულებას, რაც, ჩვენი აზრით, მოკლებულია ყოველგვარ სამართლებრივ საფუძველს.
არასამთავრობო ორგანიზაცია „ქალი და ბიზნესი“ 2006 წლიდან ახორციელებს პროექტებს, რომლებიც ქალ პატიმრებს ეხმარება პროფესიული უნარ-ჩვევების ჩამოყალიბება-განვითარებასა და დასაქმებაში. ორგანიზაციის მიერ ქალთა #5 დაწესებულებაში შეიქმნა მცირე სოციალურ საწარმო-სამკერვალო, სადაც ქალ პატიმრებს მდგრადი დასაქმებისა და სტაბილური შემოსავალის მიღების შესაძლებლობა მიეცათ. მეტი სიცხადისათვის განვმარტავთ, რომ მსგავსი სოციალური პროექტები არ ისახავს კომერციულ მიზნებს. ამ შემთხვევაში საწარმოს მიერ მიღებული შემოსავლების რეინვესტრირება ხდება, რაც დასაქმებული ქალი პატიმრების ანაზღაურებას და საწარმოს საქმიანობის გაფართოებას ხმარდება.
რაც შეეხება ტენდერს, როგორც ჩვენთვის ცნობილია, ის კანონის სრული დაცვით წარიმართა, სადაც „ქალი და ბიზნესი“-ს გარდა, იყვნენ სხვა მონაწილეებიც, თუმცა უპირატესობა მას მიენიჭა, წარდგენილ სატენდერო წინადადებაში შეთავაზებული დაბალი ფასის და იმ ფაქტორის გამო, რომ ქალთა #5 დაწესებულებში მოქმედ სოციალურ საწარმოში განხორციელდებოდა აღნიშნული სატენდერო საქმიანობა და პატიმრების დასაქმება გაგრძელდებოდა, რაც თანხვედრაშია სასჯელაღსრულების სამინისტროს ძირითად პრიორიტეტებთან.
ზემოთაღნიშნულიდან გამომდინარე ცილისწამებლური განცხადებების გაკეთება ეწინააღმდეგება საზოგადოებრივი სექტორის პრინციპებსა და ეთიკის ნორმებს. ყოვლად მიუღებლად მიგვაჩნია და კატეგორიულად ვემიჯნებით მსგავს ქმედებებს“ - ნათქვამია განცხადებაში, რომელსაც ხელს 11 არასამთავრობო ორგანიზაცია აწერს.