საქართველო ტერფიკინგის წინააღმდეგ მებრძოლ ქვეყნებს შორის მოწინავე ადგილს ინარჩუნებს. ამის შესახებ სამინისტროში აცხადებენ.

როგორც „ნიუსპრესს“ იუსტიციის სამინიტროდან აცნობეს, ამერიკის შეერთებული შტატების სახელმწიფო მდივანმა კონგრესს ტრეფიკინგთან ბრძოლის შესახებ ყოველწლიური ანგარიში წარუდგინა. საქართველო კი, აშშ-ს სახელმწიფო დეპარტამენტის მიერ ყოველწლიურად მომზადებულ ანგარიშში შეფასების უმაღლეს კატეგორიაში - პირველ კალათაში ინარჩუნებს ადგილს.

იუსტიციის სამინისტროს განმარტებით, ანგარიშის მიხედვით, სახელმწიფოები სამ კატეგორიად იყოფიან - პირველ კალათაში ხვდებიან ის სახელმწიფოები, რომლებიც სრულიად აკმაყოფილებენ ტრეფიკინგის მძიმე ფორმების აღმოფხვრის მინიმალურ სტანდარტებს; მეორე და მესამე კალათაში კი ხვდებიან ის სახელმწიფოები, რომლებიც ნაწილობრივ აკმაყოფილებენ ან სრულიად ვერ აკმაყოფილებენ მინიმალურ სატანდარტებს.

იუსტიციის სამინისტროში აცხადებენ რომ საქართველო მეხუთე წელია, რაც პირველ კალათაშია წარმოდგენილი.

„სახელმწიფო მდივნის მოხსენებაში საქართველოს შესახებ ნათქვამია, რომ მთავრობამ მნიშვნელოვნად გაზარდა ფინანსური სახსრები პრევენციულ ღონისძიებებზე, მსხევრპლთა თავშესაფარზე და პროფესიონალთა გადამზადებაზე“- აცხადებენ იუსტიციის სამინისტროში და აღნიშნავენ, რომ სახელმწიფო მდივნის ანგარიშში ასევე, დეტალურად არის ასახული იმ მრავალფეროვანი პრევენციული ღონისძიებების შესახებ, რომელიც სახელმწიფო და დონორი ორგანიზაციების მხარდაჭერით დაფინანსდა და როგორც სახელმწიფო მოხელეების, ასევე არასამთავრობო სექტორის მიერ განხორციელდა.