პოლიტიკური კოალიცია „ქართული ოცნების“ წევრი, ადვოკატი ეკა ბესელია მიიჩნევს, რომ სააპელაციო სასამართლოს შესაძლებლობა აქვს სამართლიანობის პრინციპით იხელმძღვანელოს და ქვეყნის ავტორიტეტს სირცხვილი თავიდან აარიდოს.

როგორც ბესელიამ ბიძინა ივანიშვილის მოქალაქოებასთან დაკავშირებით გამართული სააპელაციო განხილვის შემდეგ განაცხადა, პრეზიდენტის მხარე საუბრობს იმაზე, რომ ივანიშვილს მოქალაქეობა კანონიერი გზით ჩამოერთვა, თუმცა, ამის მტკიცებულებები არ აქვს.

“სასამართლოს აქვს შესაძლებლობა სამართლიანობის პრინციპით იხელმძღვაენლოს, რადგან ხელისგულზე ჩანს რეალობა, რომ პრეზიდენტმა ივანიშვილს მოქალაქეობა უკანონოდ ჩამოართვა. პრეზიდენტმა შიშის გამო მიიღო ეს გადაწყვეტილება, ახლა კი, სააპელაციო სასამართლოს შეუძლია ეს სირცხვილი ქვეყნის ავტორიტეტს თავიდან აარიდოს“ - აღნიშნა ბესელიამ.

მისივე თქმით, თუკი მოსამართლეები გადააბიჯებენ სამართლიანობის პრინციპებს მაშინ, რა თქმა უნდა, ივანიშვილს მოქალაქეობა არ აღუდგება.

დღევანდელ პროცესზე მხარეებმა მტკიცებულებათა გამოკვლევის ეტაპი გაიარეს. მოსამართლე თეა ძიმისტარაშვილი გადაწყვეტილებას ბიძინა ივაიშვილის მოქალაქეობასთან დაკავშირებით 29 ივინისს 10.00 საათზე გამოაცხადებს.

ივანიშვილის ადვოკატებმა სააპელაციო სასამართლოში საქალაქო სასამართლოს გადაწყვეტილება გაასაჩივრეს ბიძინა ივანიშვილისთვის მოქალაქეობის ჩამორთმევასთან დაკავშირებით პრეზიდენტის ბრძანების კანონიერად ცნობის თაობაზე.