კოალიცია „ქართული ოცნების“ ლიდერის ბიძინა ივანიშვილის ადვოკატების სააპელაციო სარჩელზე - პრეზიდენტის მიერ გამოცემული აქტის  ბათილად ცნობის თაობაზე - სასამართლო გადაწყვეტილებას 29 ივნისს გამოიტანს.

საქმე პრეზიდენტის იმ ბრძანებას ეხება, რომლის თანახმადაც ივანიშვილს საქართველოს მოქალაქეობა ჩამოერთვა.

სააპელაციო სასამართლოში გამართულ დღევანდელ პროცესზე მხარეებმა მტკიცებულებები წარადგინეს და მათი განხილვის ეტაპიც გაიარეს.

აპელანტი მხარე მოითხოვდა სასამართლოს ყურადღება გაემახვილებინა ბიძინა ივანიშვილის მიერ 2011 წლის 7 ოქტომბერს გაკეთებულ განცხადებაზე, რომლითაც მან პოლიტიკაში მოსვლის შესახებ გადაწყვეტილება გამოაცხადა.

მათი მტკიცებით, სწორედ ამის შემდეგ დაიწყო პროცესი მისი მოქალაქეობის კანონიერების დადგენაზე, მანამდე კი - ივანიშვილის მოქალაქეობასთან დაკავშირებით კითხვის ნიშნები არ არსებობდა. ეს კი, იმას მიუთითებს, რომ მას მოქალაქეობა პოლიტიკური მოტივით ჩამოართვეს.

პრეზიდენტის მხარემ განმარტა, რომ ივანიშვილმა საქართველოს მოქალაქეობის შემდეგ საფრანგეთის მოქალაქეობა მიიღო, რაც უდავო ფაქტობრივ გარემოებას წარმოადგენს.

მოსამართლეების თეა ძიმისტარაშვილის, ირაკლი შენგელიას და ქეთევან დუგლაძის გადაწყვეტილებით, სააპელაციო სასამართლო დადგენილებას აღნიშნულ საკითხზე 29 ივნისს 10.00 საათზე გამოიტანს.

პროცესს ივანიშვილის მხრიდან მისი ადვოკატები ზაქარია ქუცნაშვილი, შალვა თადუმაძე, ალექსანდრე ბარამიძე და ეკა ბესელია ესწრებოდნენ. პრეზიდენტის მხარეს, თინათინ სირაძე წარმოადგენდა, ხოლო სამოქალაქო რეესტრის სააგენტოს - გიორგი გაბრიელაშვილი.