აღსრულების ეროვნულ ბიუროს კოალიცია „ქართული ოცნების“ ლიდერისთვის ბიძინა ივანიშვილისთვის უფლება-მოვალეობები  ჯერ არ განუმარტავს და არც გაფრთხილება მიუცია.
ამის შესახებ „ნიუსპრესს“ ივანიშვილის ადვოკატმა შალვა თადუმაძემ განუცხადა. მისი თქმით, ჯერჯერობთ უცნობია რა გადაწყვეტილებას მიიღებს თავად ივანიშვილი.
„ჯერჯერობით სააღსრულებოს ბიძინა ივანიშვილისთვის უფლებები და მოვალეობები არ განუმარტავს და არც გაფრთხილება მიუცია. გადაიხდის თუ არა ნებაყოფლობით ივანიშვილი ჯარიმას, არ ვიცი. სავარაუდოდ, ამის შესახებ თვითონ გააკეთებს განცხადებას“- აღნიშნა თადუმაძემ.
აღსრულების ეროვნულ ბიუროში კოალიცია „ქართული ოცნების“ ლიდერის ბიძინა ივანიშვილის დაჯარიმებასთან დაკავშირებით 2 სააღსრულებო ფურცელი დღეს შევიდა.

ამის შესახებ განცხადება დღეს აღსრულების ეროვნულმა ბიურომ გაავრცელა, რომელშიც ნათქვამია, რომ სააღსრულებოში თბილისის სააპელაციო სასამართლოს მიერ გაცემული 2 სააღსრულებო ფურცელი შევიდა, რომელთა თანახმად, ბიძინა ივანიშვილს სახელმწიფო ბიუჯეტის სასარგებლოდ, ჯარიმის სახით, 74 325 065. 65 ლარის გადახდა დაეკისრა.

ბიუროს ინფორმაციით, აღნიშნული პროცედურა პირველ ეტაპზე ითვალისწინებს მოვალის გაფრთხილებას - გადაწყვეტილების ნებაყოფლობით 7 დღის ვადაში შესრულების შესახებ, რომლის გასვლის შემდეგ, იძულებით აღსრულების კონკრეტული პროცედურები იწყება. გარდა ამისა, ბიძინა ივანიშვილს განემარტება მისი ვალდებულება და ის პროცედურები, რაც გადაუხდელობის შემთხვევაში მის მიმართ განხორციელდება, ასევე, მისი უფლება-მოვალეობები.