პოლიციელ ლაშა კურტანიძის მოსყიდვის ბრალდებით დაკავებულ ზაზა ჭელიძეს სასამართლომ ორთვიანი წინასწარი  პატიმრობა შეუფარდა. ამის შესხაებ „ნიუსპრესს“ კოალიცია „ქართული ოცნების“ წარმომადგენელმა ირაკლი სესიაშვილმა განუცხადა.

მისი თქმით, დაკავებულ ჭელიძეს დღეს ადვოკატები მოინახულებენ.

„მასთან ადვოკატები დღეს შევლენ და პოზიციებზე შეჯერდებიან. რაც შეეხება ლაშა კურტანიძეს, მე მას საერთოდ არ ვიცნობ“ - განაცხადა სესიაშვილმა.

შინაგან საქმეთა სამინისტრომ ჭელიძე პოლიციელის მოსყიდვის ბრალდებით დააკავა.

გამოძიების ინფორმაციით, გარკვეული თანხის სანაცვლოდ, ჭელიძესთან შეთანხმებით ლაშა კურტანიძეს შსს-ს თანამშრომლები ფარულად უნდა გადაეღო.

„განხორციელდა შეხვედრების სიმულირება, რომლის შედეგადაც დადასტურა ფარული ჩანაწერის მოპოვებისა და გადაცემის ფაქტი. გამოძიების პროცესში კურტანიძეს წარედგინა მოპოვებული მტკიცებულებები. მან აღიარა დანაშაული და მოახერხა მისი შემკვეთის - ზაზა ჭელიძის ფარული ჩაწერა“ - განაცხადა შინაგან საქმეთა სამინისტროს ანალიტიკური დეპარტამენტის უფროსმა შოთა უტიაშვილმა.

მისივე თქმით, კურტანიძემ მოგვიანებით დაარღვია შეთანხმების პირობები და მიიმალა.

შინაგან საქმეთა სამინისტრომ აღიარებითი ჩვენებების ვიდეომასალაც გაავრცელა, სადაც ჭელიძე საუბრობს, რომ მან ჩანაწერები თავის მეგობარს ირაკლი სესიაშვილს გადასცა და მისგან კურტანიძისთვის გადასაცემად კონვერტი მიიღო.

კოალიცია „ქართულ ოცნებაში“ განმარტავენ, რომ ზაზა ჭელიძე კოალიციის წევრი არ ყოფილა და იგი მხოლოდ ირაკლი სესიაშვილის მეგობარია.