საქართველოს კონტროლის პალატის გათვლებით, კოალიცია „ქართული ოცნების“ ლიდერს ბიძინა ივანიშვილს ჯარიმის გადახდის ვადა დღეს, 19 ივნისს ეწურება.

როგორც „ნიუსპრესს“ კონტროლის პალატაში განუცხადეს, საქალაქო სასამართლოს დადგენილება ოფიციალურად 12 ივნისს არის გამოქვეყნებული, რომლის მიხედვითაც ივანიშვილმა ჯარიმა ერთი კვირის ვადაში უნდა გადაიხადოს.

კონტროლის პალატის პრესსამსახურის ცნობით, ვადის ამოწურვის შემდეგ აღსრულების ეროვნულ ბიუროს კონტროლის პალატის მოთხოვნით, სასამართლო მიმართავს.

„ჩვენი გათვლებით, ბიძინა ივანიშვილის ჯარიმის გადახდის ვადა დღეს იწურება, თუმცა, ამას არსებითი მნიშვნელობა არ აქვს. ნებისმიერ შემთხვევაში, კომპეტენცია სასამართლოსთვისაა გადაცემული და სასამართლო მიმართავს აღსრულების ეროვნულ ბიუროს“- განუცხადეს „ნიუსპრესს“ კონტროლის პალატაში.

თბილისის საქალაქო სასამართლოს დადგენილებითა და სააპელაციო სასამართლოს გადაწყვეტილებით, ბიძინა ივანიშვილს 74 325 065 ლარის ჯარიმა ეკისრება. ივანიშვილის ჯარიმის გადახდას არ აპირებს.

თბილისის საქალაქო სასამართლომ ბიძინა ივანიშვილს კონტროლის პალატის 2 ადმინისტრაციული სამართალდარღვევის ოქმის საფუძველზე ჯამში 148 650 131 ლარიანი ჯარიმა დააკისრა.
პირველ შემთხვევაში, საქმე ეხებოდა მოსახლეობისთვის სატელიტური ანტენების დარიგებას. სასამართლომ ივანიშვილი წინასაარჩევნოდ, პოლიტიკური მიზნით, ამომრჩევლისთვის ,,გლობალ ტვ“-ს სატელიტური ანტენების უსასყიდლოდ გადაცემაში დაადანაშაულა.
მეორე შემთხვევაში კი, სასამართლომ განმარტა, რომ ივანიშვილმა საკუთარი მატერიალური სახსრებით პოლიტიკური და საარჩევნო მიზნებისთვის მისი კუთვნილი კომპანიების ,,ბურჯისა” და ,,ელიტა ბურჯის” სახელზე 239 ერთეული ავტოსატრანსპორტო საშუალება დაარეგისტრირა, რომელთა გამოყენებითაც პოლიტიკურ გაერთიანება „ქართული ოცნება-დემოკრატიული საქართველოს” მომსახურებას, ფაქტობრივად, უსასყიდლოდ უწევდა.

აღნიშნული გადაწყვეტილება ივანიშვილის ადვოკატებმა ალექსანდრე ბარამიძემ და შალვა თადუმაძემ სააპელაციო სასამართლოში გაასჩივრეს.
სააპელაციო სასამართლომ ბიძინა ივანიშვილს დაკისრებული ჯარიმა თითქმის გაუნახევრა და 74 325 065 ლარამდე შეუმცირა.
ადვოკატები საქმის გასაჩივრებას სტრასბურგის სასამართლოში გეგმავენ.