თბილისის სააპელაციო სასამართლოში კოალიცია „ქართული ოცნების“ ლიდერის ბიძინა ივანიშვილის მოქალაქეობასთან დაკავშირებული სარჩელის  განხილვა 21 ივნისისთვის გადაიდო.
ბიძინა ივანიშვილის ადვოკატებმა შალვა თადუმაძემ, ალექსანდრე ბარამიძემ, არჩილ კბილაშვილმა და ზაქარია ქუცნაშვილმა სხდომაზე თავისი მოსაზრებები დააფიქსირეს და აღნიშნეს, რომ საქალაქო სასამართლოს 2011 წლის გადაწყვეტილება - ივანიშვილის მოქალაქეობის ჩამორთმევასთან დაკავშირებით პრეზიდენტის ბრძანების კანონიერად ცნობის თაობაზე, უკანონოა და სააპელაციო სასამართლოს მისი გაუქმება შეუძლია.
როგორც პროცესზე ბარამიძემ აღნიშნა, საქალაქო სასამართლოს გადაწყვეტილებაში რამდენიმე საპროცესო დარღვევაა და „მოქალაქეობის შესახებ“ კანონის მიმართ ზერელე დამოკიდებულება დაფიქსირდა.
„კანონის მოთხოვნაა, რომ თვითნებური გადაწყვეტილებების მიღების თავიდან ასაცილებლად ნებისმიერი გადაწყვეტილება დასაბუთებელი იყოს. პრეზიდენტმა, ასევე, გამოსცა უკანონო აქტი და არ ან ვერ დაასაბუთა ის“- განაცხადა სხდომაზე ბარამიძემ.
ადვოკატების მტკიცებით, მტკიცებულებებიდან ცალსახად ჩანს, რომ პრეზიდენტ მიხეილ სააკაშვილს პირადი ინტერესები ჰქონდა ივანიშვილის მიმართ და სწორედ ამიტომ, მოქალაქეობის ჩამორთმევით, მას პირადად გაუსწორდა.
სხდომაზე თავისი მოსაზრებები მოპასუხე მხარემ - სამოქალაქო რეესტრის სააგენტოს წარმომადგენელმა გიორგი გაბრიელაშვილმა და პრეზიდენტის წარმომადგენლებმა ნანა ქოიავამ და თინათინ სირაძემაც დააფიქსირეს და აღნიშნეს, რომ აპელანტის ლოგიკა კანონის ფარგლებს სცილდება. მათი თქმით, საქართველოს პრეზიდენტი მოქმდებედა კანონით მკვეთრად განსაზღვრული უფლებამოსილების ფარგლებში. პრეზიდენტის მხარის განცხადებით, თბილისის საქალაქო სასამართლოს ადმინისტრაციულ საქმეთა კოლეგიის გადაწყვეტილების გაუქმების საფუძველი არ არსებობს.
მოსამართლე თეა ძიმისტარაშვილის განცხადებით, სხდომა 21 ივნისს 10.00 საათიდან მტკიცებულებების განხილვით დაიწყება.