საქართველოს სახალხო დამცველი ხელისუფლებას შეზღუდული შესაძლებლობების მქონე პირების უფლებების დაცვისა და მათთვის სათანადო პირობების შექმნისკენ მოუწოდებს.

შესაბამისი მიმართვა ომბუდსმენმა დღეს შეზღუდული შესაძლებლობის მქონე პირთა უფლებების დაცვის დღესთან დაკავშირებით გამოაქვეყნა.

სახალხო დამცევლი აღნიშნავს, რომ მიუხედავად ქვეყანაში განხორციელებული გარკვეული ცვლილებისა, შეზღუდული შესაძლებლობის მქონე პირთა მდგომარეობა ჯერ კიდევ დისკრიმინაციულია, რასაც მის მიერ ჩატარებული მონიტორინგის შედეგებიც ცხადყოფს.

„ეს ადამიანები ხშირად ხდებიან არასათანადო, არაადამიანური და დამამცირებელი მოპყრობის მსხვერპლი, განსაკუთრებით, რეზიდენტულ დაწესებულებებში“-აღნიშნავს ომბუდსმენი.

მისივე თქმით, ქვეყანაში რადიკალურად შემცირდა დიდი ზომის ბავშვთა ინსტიტუციების რიცხვი, თუმცა, არც ერთი შეზღუდული შესაძლებლობის მქონე პირთა ინსტიტუცია მცირე საოჯახო ტიპის სახლით არ ჩანაცვლებულა.

ომბუდსმენი მიმართვაში თავის ყოველწლიურ ანგარიშებში ასახულ პირდაპირი და არაპირდაპირი დისკრიმინაციის ისეთ თვალსაჩინო ფაქტებზეც საუბრობს, როგორიცაა დასაქმების, ჯანმრთელობისა და რეაბილიტაციის, განათლებისა და პირადი ცხოვრების ხელმისაწვდომობა.

„კვლავ მნიშვნელოვან პრობლემად რჩება როგორც ფიზიკური, ისე საინფორმაციო ხელმისაწვდომობის შეზღუდვა, ინფრასტუქტურის ბარიერები, სამართლებრივი დაცვა და სხვა მრავალი“ - აღნიშნავს სახალხო დამცველი.

მისივე თქმით, მოქალაქეების მიმართვები აჩვენებს, რომ პოლიტიკის დონეზე განხორციელებული ცვლილებები შეზღუდული შესაძლებლობის მქონე კონკრეტულ პირებამდე ჯერ კიდევ არ მისულა.