„გლობალ ტვ“-ს უცხოელ მეწილესთან ერთად დაკავების დროს კოალიცია „ქართული ოცნების“ ლიდერის ბიძინა ივანიშვილის ძმა, ალეკო ივანიშვილი იმყოფებოდა.  ამის შესახებ „ნიუსპრესს“ კოალიციის წარმომადგენელმა, ადვოკატმა ეკა ბესელიამ განუცხადა.
ბესელიას ინფორმაცია, „გლობალ ტვ“-ს მეწილე ალექსანდრე რონჟესი აეროპორტში, ყოველგვარი ახსნა-განმარტების გარეშე მაშინ დააკავეს, როცა მას ალეკო ივანიშვილი აცილებდა.
დაკავებულის ადგილ-სამყოფელი ამჟამად უცნობია. დეტალების გარკვევას ადვოკატები ცდილობენ, რომლებიც აეროპორტში მიდიან.
ალექსანდრე რონჟესმა რამდენიმე დღის წინ პრესკონფერენცია გამართა და ხელისუფლების მიერ „გლობალ ტვ“-სთვის შექმნილ პრობლემებზე ისაუბრა. მან აღნიშნა, რომ „გლობალ ტვ“-ს აქამდე საკმაოდ მზარდი ბიზნესი ჰქონდა, თუმცა, პირველი პრობლემები პაკეტში „მაესტროს“ ჩასმის შემდეგ შეექმნა. პრობლემები განსაკუთრებით გამწვავდა მას შემდეგ, რაც კომპანია „მე-9 არხის“ გაშუქებასაც დათანხმდა.
რონჟესმა სახელმწიფოს მხრიდან მის ბიზნესზე ირიბ ზეწოლაზეც ისაუბრა.
ამასთან, სასამართლოს გადაწყვეტილებით, „გლობალ ტვ“-ს მის მიერ დამონტაჟებული ყველა ანტენის ჩამოხსნა მოუწევს, რაც კომპანიას, ფაქტობრივად, გაკოტრების ზღვარზე აყენებს.