მთავარი პროკურორის პირველმა მოადგილემ დავით საყვარელიძემ თანამდებობა დატოვა.
პროკურატურის განცხადებით, იგი სამსახურიდან პირადი განცხადების საფუძველზე წავიდა და მისი გათავისუფლების შესახებ ბრძანებას იუსტიციის მინისტრმა დღეს მოაწერა ხელი.
დავით საყვარელიძე მთავარი პროკურორის პირველ მოადგილედ 2009 წლიდან მუშაობდა. მანამდე 2008-2009 წლებში იყო თბილისის პროკურორი, 2007-2008 წლებში - შიდა ქართლისა და მცხეთა-მთიანეთის საოლქო პროკურორი.
გავრცელებული ინფორმაციით, დავით საყვარელიძე „ნაციონალური მოძრაობიდან“ მაჟორიტარობის ერთ-ერთი კანდიდატი იქნება.
აღნიშნულ ინფორმაციასთან დაკავშირებით, რამდენიმე დღის წინ არასამთავრობო ორგანიზაცია „კონსტიტუციის 42-ე მუხლი“ ,,ნაციონალურ მოძრაობას” და დავით საყვარელიძეს განმარტებებს სთხოვდა.
როგორც ორგანიზაცია აღნიშნავდა, ,,პროკურატურის შესახებ” საქართველოს კანონის თანახმად, პროკურატურის საქმიანობის ერთ-ერთი მთავარი პრინციპი პოლიტიკური ნეიტრალიტეტია, პროკურატურის მუშაკი არ შეიძლება იყოს პოლიტიკური გაერთიანების წევრი ან ეწეოდეს პოლიტიკურ საქმიანობას.