კოალიცია ,,ქართული ოცნების“ ლიდერის ბიძინა ივანიშვილის წინააღმდეგ თბილისის საქალაქო სასამართლოში კონტროლის  პალატის ადმინისტრაციულსამართალდარღვევათა ოქმის განხილვა დღეს გაგრძელდება.
სხდომა დღეს 13.30 საათზე უნდა დაიწყოს.
კონტროლის პალატა ბიძინა ივანიშვილს ბრალს სდებს, წინასაარჩევნოდ პოლიტიკური მიზნით, ამომრჩევლისთვის ,,გლობალ ტვ“-ს ანტენების უსასყიდლოდ გადაცემაში.
როგორც 8 ივნისს სასამართლო სხდომის დასრულების შემდეგ, ,,ქართული ოცნების“ ადვოკატმა შალვა თადუმაძემ განაცხადა, მოსამართლე კობა გოცირიძემ დაცვის მხარის ექვსი შუამდგომლობიდან მხოლოდ ერთი და ისიც ნაწილობრივ დააკმაყოფილა, რაც მტკიცებულებების სახით ,,გლობალ ტვ“-ს ბიზნესპროექტის წარდგენას ეხებოდა.
მისი თქმით, მოსამართლემ არ დააკმაყოფილა საქმის მასალების არსებითი განხილვისა და მნიშვნელოვანი მტკიცებულებების წარდგენის შუამდგომლობები.
როგორც ადვოკატმა აღნიშნა, ბიძინა ივანიშვილის წინააღმდეგ გამამტყუნებელი განაჩენის გამოტანა შეუძლებელია, რადგან, მისი თქმით, კონტროლის პალატა ვერ ასახელებს სანქციას რის განხორციელებასაც მოითხოვს.
გარდა ამისა, დღესვე საქალაქო სასამართლო გააგრძელებს კონტროლის პალატის კიდევ ერთ ბრალდებაზე მსჯელობას, რომლითაც ივანიშვილს კომპანიების „ბურჯის“ და ,,ელიტა ბურჯის“ რესურსების გამოყენებაში, კერძოდ, 239 ერთეული სხვადასხვა კლასის ავტომანქანით შეღავათიან ფასებში მომსახურებაში ადანაშაულებენ.
ადვოკატების მტკიცებით, კონტროლის პალატის ბრალდება, თითქოს, ბიძინა ივანიშვილი პოლიტიკური მიზნებისთვის სხვადასხვა კომპანიის რესურსს იყენებს, სიმართლეს არ შეესაბამება, რადგან მათივე თქმით, ივანიშვილმა არჩევნებში მონაწილეობაზე უარი განაცხადა.
„მიუხედავად ამისა, კონტროლის პალატა დაჟინებით აცხადებს, რომ ივანიშვილი ხარჯავს თანხებს, თუმცა, ვერ უთითებს რა თანხას და რა მიმართულებით ხარჯავს. რაც შეეხება „ბურჯთან“ და ელიტა ბურჯთან“ მის კავშირს, არ არსებობს იმის დამადასტურებელი დოკუმენტი, რომ ბიძინა ივანიშვილი ამ კომპანიებში წილს ფლობს“ - განაცხადა თადუმაძემ.
მისი თქმით, კონტროლის პალატა არ ასახელებს თანხას, რასაც საერთო ჯამში მოითხოვს, თუმცა, მისივე თქმით, ის სავარაუდოდ, ხუთმაგი ოდენობით განისაზღვრება და 75 მილიონ ლარს შეადგენს.