პროკურატურამ ქუთაისში მშენებარე პარლამენტის დამხმარე შენობის ჩამონგრევის გამო, უსაფრთხოების წესების დარღვევის ბრალდებით სამშენებლო კომპანიის საქმისმწარმოებელი დავით ქავთარაძე დააკავა.
აღნიშნულთან დაკავშირებით პროკურატურა განცხადებას ავრცელებს, რომელშიც ნათქვამია, რომ მშენებლობის უსაფრთხოებაზე პასუხისმგებელმა პირმა, სამშენებლო კომპანიის საქმისმწარმოებელმა დავით ქავთარაძემ არ უზრუნველყო უსაფრთხოების წესების დაცვა, რის გამოც 7 ივნისს ჩამონგრეული სამშენებლო ხარაჩოს ქვეშ მოჰყვა და მიღებული ტრავმებისგან გარდაიცვალა სამშენებლო კომპანიის თანამშრომელი რეზო ნებიერიძე.

„ირაკლი აბაშიძის გამზირზე, ადმინისტრაციული შენობების მიმდებარედ არსებულ მშენებლობაზე, სამშენებლო კომპანიის თანამშრომლის გარდაცვალებასთან დაკავშირებული გამოძიების მიმდინარეობისას დადგინდა, რომ მშენებლობის უსაფრთხოებაზე პასუხისმგებელმა პირმა არ უზრუნველყო უსაფრთხოების წესების დაცვა. დავით ქავთარაძე ბრალდებულად იქნა ცნობილი დანაშაულისთვის, რომელსაც სისხლის სამართლის კოდექსი ითვალისწინებს“ - ნათქვამია განცხადებაში.
პროკურატურის ცნობით, სასამართლომ პროკურატურის შუამდგომლობა აღკვეთის ღონისძიების სახით პატიმრობის გამოყენების თაობაზე, დააკმაყოფილა.
ქუთაისში მშენებარე პარლამენტის ადმინისტრაციული შენობის ჩამოიშლას 7 ივნისს ერთი ადამიანის სიცოცხლე ემსხვერპლა. აღნიშნულ ფაქტზე გამოძიება პრეზიდენტმაც მოითხოვა.