„საერთაშორისო გამჭვირვალობა-საქართველო“ კომპანია „მენეჯმენტ-სერვისის“ სასამართლო სხდომის დეტალებს ავრცელებს.

როგორც ორგანიზაციის ვებ-გვერდზე გამოქვეყნებულ განცხადებაშია ნათქვამი, „მენეჯმენტ-სერვისმა“ კონტროლის პალატის გადაწყვეტილება, რომელმაც ის 476.619.51 ლარით დააჯარიმა, სასამართლოში გაასაჩივრა.

საქმეზე პირველი მოსმენა 28 მაისს გაიმართა. საქმე თბილისის საქალაქო სასამართლოს ადმინისტრაციულ საქმეთა კოლეგიის მოსამართლე დიმიტრი გვრიტიშვილმა განიხილა. განხილვას “საერთაშორისო გამჭვირვალობა - საქართველოს” იურისტი და სასამართლო მონიტორი ესწრებოდა.

„საერთაშორისო გამჭვირვალობა აღნიშნავს, რომ სასამართლო სხდომაზე რამდენიმე საყურადღებო ფაქტი დაფიქსირდა. კერძოდ, შეიქმნა შთაბეჭდილება, რომ მოსამართლე ჩქარობდა და მიზნად ჰქონდა დასახული პროცესის 1 დღეში დასრულება. მოსარჩელე მხარის მიერ არაერთხელ დაყენებული შუამდგომლობა პროცესის გადადების თაობაზე, არ დაკმაყოფილდა.

ერთ-ერთ ძირითად სადაო საკითხს კომპანიის ოფისების გარემონტებული ფართი და მათზე გაწეული ხარჯი წარმოადგენდა. დაჯარიმებულმა „მენეჯმენტ სერვისმა” პროცესის 8 ივნისამდე გადადება ითხოვა, რათა დასრულებულიყო მიმდინარე ექსპერტიზა, რომელსაც კერძო ექსპერტიზის ბიურო ატარებდა. მიუხედავად ამისა, მოსამართლე გვრიტიშვილმა არ დააკმაყოფილა აღნიშნული შუამდგომლობა იმ საფუძვლით, რომ მოსარჩელეს უკვე ჰქონდა წარმოდგენილი ხარჯთაღრიცხვის დოკუმენტები და ექსპერტიზა ახალ გარემოებას ვერ დაადასტურებდა. ასევე, არ დაკმაყოფილდა მოსარჩელეთა შუამდგომლობა მოწმის სახით დაკითხულიყვნენ ოფისებში სარემონტო სამუშაოების მწარმოებლები. მოსარჩელე მხარემ ითხოვა პროცესის სულ მცირე 1 დღით გადადება, რათა მხარეს ჰქონოდა შესაძლებლობა, კონტროლის პალატის მიერ სხდომაზე წარმოდგენილი ადმინისტრაციული საჩივრის განხილვის სხდომის ოქმს გაცნობოდა. 48 გვერდიანი დოკუმენტის გასაცნობად მოსამართლემ მხარეს მხოლოდ 1 საათი განუსაზღვრა.

ორგანიზაციის ინფორმაციით, მოსამართლემ პროცესი დააჩქარა და მოსარჩელეს საბოლოო სიტყვისთვის 10 წუთი განუსაზღვრა, რის გამოც ”მენეჯმენტ სერვისის” ერთ-ერთ წარმომადგენელს, ეკა ბესელიას სიტყვის თქმის საშუალება არ მიეცა. მოსამართლის მტკიცებით, მიცემული ვადა კომპანიის მეორე წარმომადგენელმა - ალქსანდრე ბარამიძემ მთლიანად ამოწურა. „მენეჯმენტ სერვისის“ სარჩელი კი, არ დაკმაყოფილდა.

მოსარჩელის წარმომადგენელთა განცხადებით, ისინი გაასაჩივრებენ გადაწყვეტილებას, რამდენადაც “მენეჯმენტ სერვისს” არ შეუძლია მსგავსი ოდენობის ჯარიმის გადახდა და მას გაკოტრება ემუქრება.

„საერთაშორისო გამჭვირვალობა-საქართველო“ აღნიშნავს, რომ დროულობის პრინციპი მართლმსაჯულების განხორციელებისას უმნიშვნელოვანესია, თუმცა აუცილებელია, სასამართლო გადაწყვეტილება გამოტანილი იქნას საქმის ყოველმხრივი, სრული და ობიექტური შესწავლის შედეგად. მოცემულ შემთხვევაში, კი მიღებული გადაწყვეტილების სამართლიანობის შეფასება რთულია, რამდენადაც საქმის დაჩქარებულ ვადებში განხილვის გამო, სადაო გარემოებების ყოველმხრივი და სრული გამოკვლევა ვერ მოხერხდა.

„საერთაშორისო გამჭვირვალობა - საქართველო” აგრძელებს მონიტორინგს და იმედოვნებს, რომ შემდგომ ინსტანციებში საქმის განხილვა უფრო საფუძვლიანად მოხდება, რაც ნაკლებ კითხვის ნიშნებს დატოვებს.