საქართველოს ახალგაზარდა იურისტთა ასოციაციამ დღეს საქალაქო სასამართლოში გამართულ სხდომებზე, რომლებზეც კოალიცია „ქართული ოცნების“ ლიდერის ბიძინა ივანიშვილის მიმართ შედგენილ სამართალდარღვევათა ოქმს განიხილავდნენ, დარღვევები დააფქსირა.
აღნიშნულ პროცესებს საიას იურისტი ლელა ტალიური აკვირდებოდა.
როგორც მან ჟურნალისტებთან საუბარში აღნიშნა, ყველაზე მნიშვნელოვანი დარღვევა დაცვის მხარისთვის სათანადო მომზადებისთვის დროის არქონა იყო.
ტალიურის განმარტებით, ივანიშვილის წინააღმდეგ შედგენილია საკმაოდ სქელტანიანი, 600-გვერდიანი საქმე, რომელიც ადვოკატებს კონტროლის პალატის მიერ გუშინ ჩაბარდათ. ივანიშვილის ადვოკატებს კი, სასამართლოდან გუშინ საღამოს გაეგზავნათ უწყება, რომ პროცესები დღეს იყო ჩანიშნული.
„იმის მიუხედავად, რომ კანონმდებლობა დაცვის მხარისთვის სათანადო მომზადების საშუალებას ითვალსწინებს, რათა მათ ჰქონდეთ საკმარისი დრო მტკიცებულებების მომზადებლად, ადვოკატებს ამის საშუალება არ მიეცათ“-აღნიშნა საიას იურისტმა.
მისივე განცხადებით, ასევე კონტროლის პალატამ უნდა დაასაბუთოს, რამდენად არის საქმეში ჩართული კომპანიების მესაკუთრე ბიძინა ივანიშვილი, რასაც ამ ეტაპზე ვერ ასაბუთებს.
კონტროლის პალატის მიერ გუშინ გავრცელებულ განცხადებაში აღნიშნულია, რომ მონიტორინგის სამსახური პოლიტიკური კოალიცია “ქართული ოცნების“ მიერ კომპანიების - “ბურჯის”, “ელიტა ბურჯის” და “გლობალ კონსალტინგ გრუპის” ტექნიკური, პერსონალური და სხვა საშუალებების პოლიტიკური და საარჩევნო მიზნებისთვის გამოყენების საკითხს სწავლობდა. საუბარია ელექტორატისთვის მასობრივად და უსასყიდლოდ ათეულათასობით სატელიტური ანტენების დარიგების და 239 ერთეული სხვადასხვა კლასის ავტომანქანით შეღავათიანი მომსახურების ფაქტებზე.
კონტროლის პალატა აცხადებს, რომ მონიტორინგის პროცესში მოიპოვეს მტკიცებულებები, რომლებიც პოლიტიკური კოალიციის მიერ საარჩევნო და პოლიტიკური მიზნებისთვის ზემოაღნიშნული კომპანიების მომსახურების კანონსაწინააღმდეგოდ გამოყენების ფაქტებს ადასტურებს.
პალატამ ფიზიკური პირი ბიძინა ივანიშვილი სამართალდარღვევის სუბიექტად განსაზღვრა და შესაბამისი ოქმი სასამართლოს გადაუგზავნა. სასამართლო პროცესი 11 ივნისიდან განახლდება.