პოლიტიკური კოალიცია „ქართული ოცნების“ ლიდერის ბიძინა ივანიშვილის ადვოკატები ალექსანდრე ბარამიძე და შალვა თადუმაძე თბილისის საქალაქო სასამართლოს სუბიექტურობასა და მიკერძოებულობაში ადანაშაულებენ.

დღეს საქალაქო სასამართლომ კონტროლის პალატის მიერ ბიძინა ივანიშვილის წინააღმდეგ ადმინისტრაციულ სამართალდარღვევათა ოქმის განხილვა დაიწყო. კონტროლის პალატა ივანიშვილს კომპანიების „ბურჯის“ და ,,ელიტა ბურჯის“ რესურსების გამოყენებაში, კერძოდ, 239 ერთეული სხვადასხვა კლასის ავტომანქანით შეღავათიან ფასებში მომსახურებაში ადანაშაულებს, რასაც კონტროლის პალატის ბრალდებით, ივანიშვილი საარჩევნო და პოლიტიკური მიზნებისთვის იყენებდა.

სასამართლო სხდომა 11 ივნისს გაიმართება.

დაცვის მხარემ სხდომაზე მოსამართლის ნანა დარასელიას აცილების შუამდგომლობა დააყენა, რაც სასამართლომ არ დააკმაყოფილა.

როგორც თადუმაძემ განაცხადა, სასამართლომ სამართლიანობის პრინციპი დაარღვია და კონტროლის პალატას მტკიცებულებებთან დაკავშირებით მეტი შესაძლებლობა მისცა.

მისი განმარტებით, „ქართული ოცნების“ მხარეს მტკიცებულებების მოსაძიებლად მხოლოდ რამდენიმე საათი ჰქონდა, რადგან ადვოკატებს საქმის მასალები მხოლოდ გუშინ ჩაბარდათ.

ადვოკატების მტკიცებით, კონტროლის პალატის ბრალდება, თითქოს, ბიძინა ივანიშვილი პოლიტიკური მიზნებისთვის სხვადასხვა კომპანიის რესურსს იყენებს, სიმართლეს არ შეესაბამება, რადგან მათივე თქმით, ივანიშვილმა არჩევნებში მონაწილეობაზე უარი განაცხადა.

„მიუხედავად ამისა, კონტროლის პალატა დაჟინებით აცხადებს, რომ ივანიშვილი ხარჯავს თანხებს, თუმცა, ვერ უთითებს რა თანხას და რა მიმართულებით ხარჯავს. რაც შეეხება „ბურჯთან“ და ელიტა ბურჯთან“ მის კავშირს, არ არსებობს იმის დამადასტურებელი დოკუმენტი, რომ ბიძინა ივანიშვილი ამ კომპანიებში წილს ფლობს“ - განაცხადა თადუმაძემ.

მისი თქმით, კონტროლის პალატა არ ასახელებს თანხას, რასაც საერთო ჯამში მოითხოვს, თუმცა, მისივე თქმით, ის სავარაუდოდ, ხუთმაგი ოდენობით განისაზღვრება და 75 მილიონ ლარს შეადგენს.