კოალიცია „ქართული ოცნების“ წევრი ეკა ბესელია და პარტია „ქართული ოცნება - დემოკრატიული საქართველოს“ თავმჯდომარე მანანა კობახიძე ქუთაისში დაკავებული ახალგაზრდების საქმის დეტალების გასაცნობად გაემგზავრნენ.

როგორც „ნიუსპრესს“ ეკა ბესელიამ განუცხადა, იმის გამო, რომ პოლიციის მხრიდან დევნა სხვა ახალგაზრდებაც ემუქრებათ, თბილისდან მათთან ერთად ადვოკატთა ჯგუფიც გაემგზავრა.

„ჩავალთ და ადგილზე გავერკვევით ვითარებაში. ასევე თბილისიდან ადვოკატები ჩამოდიან, რომლებიც დაიცავენ ყველა იმ ადამიანს, ვისაც უკანონოდ ემუქრება პოლიციის მხრიდან დევნა. ასე რომ, დავიცავთ მათ უფლებებს, ვისაც უკანონოდ და უსამათლოდ დევნიან“- აღნიშნა ბესელიამ.

კოალიცია „ქართული ოცნების“ აქტივისტები გრიგოლ ამბროლაძე, მიხეილ მესხი და მიხეილ ამაშუკელი ამომრჩევლის მოსყიდვის ბრალდებით დააკავეს. ისინი 6 ივნისს ქუთაისის მთავარ სამმართველოში დაკითხეს. საქართველოს პროკურატურამ მიიჩნია, რომ აღნიშნული პირების ამომრჩევლის მოსყიდვის ბრალდებით პასუხისგებაში მიცემისთვის საკმარისი საფუძველი არსებობს და სამივე მათგანი დააკავა.