საქართველოს ახალგაზრდა იურისტთა ასოციაცია კონტროლის პალატის პოლიტიკური პარტიების ფინანსური მონიტორინგის სამსახურის მიერ ფონდ „ქომაგის“ ანგარიშზე  შემომწირავი ბიძინა გიორგობიანის დაჯარიმების ფაქტს უკანონოდ მიიჩნევს.
საიაში მიიჩნევენ, რომ აღნიშნულ საქმეზე კონტროლის პალატის მონიტორინგის სამსახური „მოქალაქეთა პოლიტიკური გაერთიანებების შესახებ“ საქართველოს ორგანული კანონით მინიჭებული მანდატის ფარგლებს გასცდა და მისი გადაწყვეტილება ბიძინა გიორგობიანის დაჯარიმების თაობაზე უკანონო და დაუსაბუთებელია.
საიაში აცხადებენ, რომ ჯერ კიდევ 2012 წლის 18 მაისს კონტროლის პალატის მონიტორინგის სამსახური აცხადებდა, რომ ბიძინა გიორგობიანი იყო საქართველოს „კონსერვატიული პარტიის“ საგარეო ურთიერთობათა მდივანი, იმავდროულად იყო პოლიტიკური კოალიცია „ქართული ოცნება - დემოკრატიული საქართველოს“ წევრი. კონტროლის პალატისვე საჯარო განცხადებებით, იგი მჭიდროდ იყო დაკავშირებული „ქართული ოცნების“ გეგმებთან.
„როგორც 18 მაისის განცხადებიდან ირკვევა, იმავე დღეს, ანუ 2012 წლის 18 მაისს მონიტორინგის სამსახურმა მიიღო გადაწყვეტილება დაეყადაღებინა საქველმოქმედო ფონდის „ქომაგის“ ანგარიშები და განეხორციელებინა ფონდის ფინანსური საქმიანობის მონიტორინგი. აღნიშნული კი იმას გულისხმობდა, რომ 18 მაისს მონიტორინგის სამსახურმა საკუთარი გადაწყვეტილებით ფონდი „ქომაგი“ განსაზღვრული მონიტორინგის სუბიექტად ცნო, რაც ფონდისთვის დადგენილი შეზღუდვების გავრცელებას გულისხმობდა“- აცხადებენ საიაში და ხაზს უსვან იმ გარემოებას, რომ გიორგობიანი გამორიცხავს განხორციელებული ტრანზაქციის პოლიტიკურ შინაარსს და აცხადებს, რომ ის არ არის არც საქართველოს „კონვერვატიული პარტიის“ საერთაშორისო მდივანი და არც პოლიტიკური კოალიცია „ქართული ოცნება - დემოკრატიული საქართველოს“ წევრი. ასევე, გიორგობიანი განმარტავს, რომ ის არ არის საქართველოს მოქალაქე და შესაბამისად არ ირიცხება რომელიმე პოლიტიკური პარტიის წევრად საქართველოში.
საია-ს ცნობით, გარდა ამისა, მონიტორინგის სამსახურის განცხადებით, ბიძინა გიორგობიანმა შემოწირულება 2012 წლის 10 მაისს განახორციელა, ხოლო გადაწყვეტილება საქველმოქმედო ფონდი „ქომაგის“ ანგარიშების დაყადაღების და ფონდის ფინანსური საქმიანობის მონიტორინგის თაობაზე მონიტორინგის სამსახურმა მხოლოდ 2012 წლის 18 მაისს მიიღო. შესაბამისად, მონიტორინგის სამსახური ვალდებულია დაამტკიცოს, რომ ჯერ კიდევ 10 მაისს ბიძინა გიორგობიანისთვის ცნობილი იყო ფონდი „ქომაგის“ მონიტორინგის სუბიექტად მიჩნევის და შესაბამისად, მასზე პარტიებისთვის დადგენილი შეზღუდვების გავრცელების თაობაზე.
საიაში აცხადებენ, რომ პირველი საჯარო განცხადება ფონდი ,,ქომაგის“ დაარსებასა და მისი საქმიანობის მიზნებთან დაკავშირებით მონიტორინგის სამსახურმა მხოლოდ 10 მაისის შემდეგ, 14 მაისს გააკეთა. შესაბამისად, ბიძინა გიორგობიანისთვის შეუძლებელი იყო იმის ცოდნა, რომ 10 მაისს ის „მოქალაქეთა პოლიტიკური გაერთიანებების შესახებ“ საქართველოს ორგანული კანონის მოთხოვნებს არღვევდა.
„ყოველივე ზემოაღნიშნულიდან გამომდინარე, მიგვაჩნია, რომ დადგენილება ბიძინა გიორგობიანის დაჯარიმების თაობაზე არ შეესაბამება კანონის მოთხოვნებს“- აცხადებენ საიაში.
2012 წლის 28 მაისს ბიძინა გიორგობიანი„ფონდი ქომაგის“ ანგარიშზე განხორციელებული შემოწირულობის ათმაგი ოდენობით დაჯარიმდა.