მსჯავრდებული პეტრე ოვანოვის საქმესთან დაკავშირებით საზოგადოებრვი მოძრაობა „სოლიდარობა უკანონო პატიმრებს“ დამატებით ცნობებს ავრცელებს.
როგორც „ნიუსპრესს“ საზოგადოებრივი მოძრაობიდან აცნობეს, მას შემდეგ, რაც მედიის საშუალებით საჯარო გახდა მსჯავრდებული პეტრე ოვანოვის მიმართ #15 სასჯელაღსრულების დაწესებულების ხელმძღვანელობის მხრიდან მისი გაუპატიურების ფაქტი, მსჯავრდებულმა რამდენიმე საათის შემდეგ ადვოკატს დაურეკა და სთხოვა, რომ ყველა სახის მოქმედება შეეჩერებინა, რაც მათ მიერ იყო შეთანხმებული.
„მსჯავრდებული ასევე ორჯერ მოინახულეს სახალხო დამცველის წარმომადგენლების მიერ. აღნიშნულის შემდგომ ადვოკატმა ვლადიმერ მაჭარაშვილმა კიდევ ერთხელ მოინახულა მსჯავრდებული ოვანოვი, რომელსაც კვლავ არ უარყვია მის მიმართ მომხდარი ფაქტის შესახებ. თუმცა, იმის გამო, რომ იმყოფება იმავე დაწესებულებაში, რომლის ხელმძღვანელი პირებიც დაადანაშაულა მის მიმართ განხორციელებულ ძალადობრივ დანაშაულში, ბუნებრივია მისი თავისუფლად აზრის გამოხატვა მინიმუმ შეზღუდულია“- აცხადებს „სოლიდარობა უკანონო პატიმრებს“.
მათივე ცნობით, ადვოკატი მაჭარაშვილი აცხადებს, რომ მსჯავრდებული პეტრე ოვანოვი ადმინისტრაციის მიერ ძლიერი ფსიქოლოგიური ზეწოლის ქვეშაა და სანამ იგი გადაყვანილი არ იქნება სხვა სასჯელაღსრულების დაწესებულებაში, მსჯავრდებული თავისუფლად ამ თემაზე ვერ ისაუბრებს.
საზოგადოებრივ მოძრაობაში აცხადებენ, რომ მსჯავრდებულ ოვანოვის სხვა დაწესებულებაში გადაყვანის თაობაზე უკვე გაკეთდა მიმართვა ადვოკატ მაჭარაშვილის მხრიდან საჯელაღსრულების მინისტრის და სახალხო დამცველის სახელზე. თუმცა, ამ დრომდე ოვანოვი კვლავ იმავე დაწესებულებაში რჩება.
მათივე ცნობით, აღნიშნულ ფაქტებზე დაწყებულია გამოძიება და იგეგმება მსჯავრდებულ ოვანოვის დაკითხვა, თუმცა, შეუძლებელია ობიექტური ჩვენების მიცემა მსჯავრდებულ ოვანოვის მხრიდან ვიდრე მას სხვა დაწესებულებაში არ გადაიყვანენ.
როგორც ცნობილია, პეტრე ოვანოვის მეგობარმა ყოფილმა პატიმარმა, რომლის ვინაობაც არ სახელდება, ადვოკატ ეკა ბესელიას, საადვოკატო ბიუროში ოვანოვის ხელნაწერი მიუტანა.
წერილში ოვანოვი ქსნის მე-15-ე დახურული ტიპის დაწესებულების თანამშრომელთა მხრიდან მასზე განხორციელებულ ფიზიკურ, მორალურ ზეწოლასა და არაადამიანურ მოპყრობაზე საუბრობს. კონკრეტულად კი, წერილის თანახმად, ოვანოვის თქმით, მიმდინარე წლის 24 თებერვალს, სასჯელაღსრულების დაწესებულების თანამშრომლებმა ის გააუპატიურეს, სასტიკად სცემეს და დაემუქრნენ, რომ იმ შემთხვევაში, თუ ეს ამბავი გახმაურდებოდა, მისი სიცოცხლე საფრთხეში აღმოჩნდებოდა. მსჯავრდებული წერილში დახმარებას ითხოვს.