საქართველოს ახალგაზრდა იურისტთა ასოციაცია ისანი-სამგორის რაიონის გამგებლის მოადგილის ბესო გაზდელიანის პასუხისგებაში მიცემას ითხოვს.
საია-ს მიერ გავრცელებულ განცხადებაში ნათქვამია, რომ სხვადასხვა ტელეკომპანიის ეთერით გავრცელებულ ვიდეომასალში ნათლად ჩანს როგორ აყენებს ფიზიკურ შეურაცხყოფას გამგებლის მოადგილე ორთაჭალაში შეკრებილ მოქალაქეებსა და ერთ-ერთი ოპოზიციური პარტიის აქტივისტებს, რომლებიც თბილისში მომხდარ წყალდიდობასთან დაკავშირებით ხელისუფლების მიერ გატარებულ ღონისძიებებს აკრიტიკებდნენ.
„კადრებიდან ჩანს, რომ ჩხუბის ინსპირატორი ბესო გაზდელიანია. იკვეთება დანაშაულის ნიშნები. იმის გათვალისწინებით, რომ ცემის ამსახველი ვიდეომასალა გავიდა რამდენიმე ტელეკომპანიის ეთერში, კომპეტენტური საგამოძიებო ორგანოები ვალდებული არიან გამოძიება დაიწყონ“- ნათქვამია საიას განცხადებაში.
საია, ასევე, გამგებლის მოადგილის ქმედებასთან დაკავშირებით თბილისის მერიის მიერ გაკეთებული განცხადების გამო გამოთქვამს შეშფოთებას. ასოციაციის განმარტებით, მერია აქცენტს მოქალაქეთა ქმედებაზე აკეთებს და აცხადებს, რომ მათ პერსონალური შურაცხყოფა მიაყენეს გაზდელიანს, საიას განცხადებით, ვიდეომასალის მიხედვით, გამგებლის მოადგილისთვის შეურაცხყოფის მიყენების ფაქტი არ დასტურდება.
საია თბილისის მერიას და ისანი-სამგორის რაიონის გამგებლის მოადგილეს შეახსენებს, რომ ადამიანის უფლებათა ევროპულმა სასამართლომ არაერთხელ განაცხადა -,,გამოხატვის თავისუფლებით დაცულია არა მხოლოდ ისეთი გამონათქვამი, რომელსაც საზოგადოება ნეიტრალურად აღიქვამს, არამედ ისეთი განცხადებებიც, რომლებიც შოკისმომგვრელი, ამაღელვებელი და შეურაცხმყოფელია საზოგადოებისა ან მისი განსაზღვრული ნაწილისათვის“. გამოხატვის თავისუფლების ფარგლები განსაკუთრებით დაცულია მაშინ, როცა კრიტიკის ობიექტი ხელისუფლებაა.
საიას ცნობით, მერიის განცხადებაში აღნიშნულია, რომ გაუმართლებლად მიაჩნია ბესო გაზდელიანის ქმედება და მერიის ყველა თანამშრომელს თავშეკავებისკენ მოუწოდებს.
„გვსურს, მერიას შევახსენოთ, რომ მაშინ როდესაც, საჯარო მოხელე ჩართულია ძალადობაში, მერიას მოეთხოვება უფრო მეტი, ვიდრე ასეთი ქმედების ,,გაუმართლებლად” მიჩნევაა. გაზდელიანის ქმედება აშკარად ჯდება ზოგადზნეობრივი ნორმის საწინააღმდეგო და მერიის დისკრედიტაციისკენ მიმართული საქციელის განსაზღვრებაში, რაც წარმოშობს უშუალოდ თბილისის მერის ვალდებულებას დააკისროს ბესო გაზდელიანს დისციპლინური პასუხისმგებლობა“- განაცხადეს საიაში.
ასოციაცია, საგამოძიებო ორგანოებს მედიაში გავრცელებულ ფაქტზე წინასწარი გამოძიების დაწყებისკენ მოუწოდებს. თუ დადგინდება, რომ ბესო გაზდელიანის ქმედება არ შეიცავს დანაშაულის ნიშნებს, თბილისის მერმა გაზდელიანის მიმართ დისციპლინური პასუხისმგებლობის ზომა უნდა გამოიყენოს.