საქართველოს სახალხო დამცველი სასჯელაღსრულების, პრობაციისა და იურიდიული დახმარების საკითხთა სამინისტროს  გარდაცვლილი პატიმრის ზურაბ დელიანიძის პირად საიდუმლოს მიკუთვნებული ინფორმაციის გასაჯაროებაში ადანაშაულებს. ამის შესახებ ომბუდსმენის პრესსამსახურის მიერ გავრცელებულ განცხადებაშია ნათქვამი.

საქმე ეხება სამინისტროს ოფიციალურ ვებგვერდზე 3 მაისს მსჯავრდებულ ზურაბ დელიანიძის გარდაცვალების ფაქტთან დაკავშირებით გამოქვეყნებულ განცხადებას, რომლის თანახმადაც მსჯავრდებული ვენერიული დაავადების მწვავე ფორმით ავადმყოფობდა. მათი ცნობით, იგი 2012 წლის 7 მარტს, ბრალდებულთა და მსჯავრდებულთა #18 სამკურნალო დაწესებულებაში იქნა გადაყვანილი. მას ინტენსიური მკურნალობის კურსი დაეწყო, მაგრამ მიმდინარე წლის 1 მაისს გარდაიცვალა.

ომბუდსმენი აღნიშნულთან დაკავშირებით აცხადებს, რომ საქართველოს კონსტიტუციის თანახმად, ოფიციალურ ჩანაწერებში არსებული ინფორმაცია, რომელიც ადამიანის ჯანმრთელობასთან, მის ფინანსებთან ან სხვა კერძო საკითხებთან არის დაკავშირებული, ამ აპიროვნების თანხმობის გარეშე, არავისთვის არ უნდა იყოს ხელმისაწვდომი, გარდა კანონით დადგენილი შემთხვევებისა.

„ცხადია, სამინისტრომ საკუთარი განცხადებით მსჯავრდებულის პირად საიდუმლოებას მიკუთვნებული ინფორმაცია გაავრცელა, რაც როგორც გარდაცვლილი მსჯავრდებულის, ასევე სხვა პირთა უფლებებს ხელყოფს“ - აცხადებს სახალხო დამცველი.
ამასთან, მისი განმარტებით, სქესობრივი გზით გადამდები დაავადებების შესახებ ინფორმაციის გასაჯარობა განსაკუთრებულ შემთხვევას წარმოადგენს, რადგან ამით არა მარტო გარდაცვლილი პირის კანონიერი ინტერესები ილახება, არამედ პაციენტის ოჯახის წევრებს, ნათესავებს ჩრდილი ადგება.

„სამინისტროს არგუმენტი იმასთან დაკავშირებით, რომ საკითხისადმი „საზოგადეობის მაღალი ინტერესი“ არსებობდა, პირადი საიდუმლოს გამჟღავნების საფუძველს არ წარმოადგენს და ინფორმაციის გამჟღავნების უკანონობას კიდევ ერთხელ ადასტურებს“ - აცხადებს ტუღუში.

მისივე თქმით, პირადი ან ოჯახური საიდუმლოს უკანონოდ გავრცელება, საქართველოს სისხლის სამართლის კოდექსის თანახმად დასჯადია.

სახალხო დამცველი სამართალდამცავ ორგანოებს აღნიშნულ ფაქტზე გამოძიების დაწყების მოთხოვნით მიმართავსა და შესაბამისი პირების სისხლის სამართლის პასუხისგებაში მიეცემას მოითხოვს.

ამასთან ის, მინისტრ ხათუნა კალმახელიძეს მოუწოდებს, მსგავსი უფლებადარღვევათა თავიდან ასაცილებლად სამომავლოდ სათანადო ღონისძიებები გაატაროს.

გარდაცვლილი პატიმრის ზურაბ დელიანიძის ფოტოები 3 მარტს სოციალურ ქსელში გავრცელდა. ფოტოებზე მას სხეულზე დაზიანებები აღენიშნება. პრობაციისა და იურიდიული დახმარების საკითხთა სამინისტროში აცხადებენ, რომ პატიმარი ზურაბ დელიანიძე ვენერიული დაავადების მწვავე ფორმით ავადმყოფობდა.