მაკა ასათიანის ადვოკატი თბილისის საქალაქო სასამართლოს გადაწყვეტილებას ასათიანის ოჯახისთვის 900 ათასი ლარის დაკისრების შესახებ, უკანონოს უწოდებს.
ამის შესახებ ასათიანის ადვოკატმა დიმიტრი გაბუნიამ, ოჯახის ადვოკატმა პაატა კიკვიძემ და „მერსედესის“ წარმომადგენლობის, შპს „აკას“ ადვოკატმა როინ მიგრიაულმა დღეს გამართულ პრესკონფერენციაზე განაცხადეს.
ისინი განმარტავენ, რომ ასათიანის შეფასებით, სასამართლომ მის ოჯახს სოლიდური თანხა სრულიად უკანონოდ დააკისრა. მისივე თქმით, სასამართლოს გადაწყვეტილებას არავითარი სამართლებრივი საფუძველი არა აქვს. ასათიანი მიიჩნევს, რომ მის მიმართ შეტევა ტელეკომპანია „მაესტროს“ დაფინანსების გამო განხორციელდა.
„მისი ფინანსური მხარდაჭერის გარეშე „მაესტრო“ 2011 წლის ნოემბრიდან მაუწყებლობას ვერ შეძლებდა“ - განაცხადა გაბუნიამ.
ადვოკატის განმარტებით, მისი დაცვის ქვეშ მყოფი აცხადებს, რომ ძოწენიძე, რომლის სასარგებლოდაც ასათიანს „აკას“-ს 20% ჩამოერთვა, მარიონეტია, რომელსაც გარკვეული ძალა მის დასასჯელად იყენებს.
გაბუნიას განცხადებით, მაკა ასათიანი საქართველოში ვერ ჩამოდის, რადგან ამ ნაბიჯს გარკვეული საფრთხის შემცველად მიიჩნევს.

პაატა კიკვიძის თქმით კი, დავით ძოწენიძეს წლების განმავლობაში კონტაქტი არ ქონია „აკასთან“, ამიტომ მისი მოთხოვნის დაკმაყოფილებას, თუნდაც ხანდაზმულობის მოტივი გამორიცხავდა.
„მიუხედავად ამისა, რაოდენ გასაოცარიც უნდა იყოს სარჩელი დაკმაყოფილდა და ძოწენიძემ თავი „აკას“ პარტნიორად აღიდგინა“-განაცხადა ადვოკატმა.
„აკას“ ადვოკატის როინ მიგრიაულის თქმით, არ არის გამორიცხული, რომ „მერსედესმა“ ამ დავის პირობებში საერთოდ გაწყვიტოს ურთიერთობა საქართველოსთან.
„აკა“ „მერსედესის“ ერთადერთი დისტრიბუტორია კავკასიაში. ის საქართველოს ბიუჯეტში მსხვილი გადამხდელია. მისივე თქმით, მათი მხრიდან უკვე დაისვა გარკვეული კითხვები და მათზე პასუხია გასაცემი.
27 აპრილს თბილისის საქალაქო სასამართლომ მაკა ასათიანსა და მისი ოჯახის წევრებს 900 ათასი ლარის გადახდა დააკისრა. საუბარია „მერსედეს ბენცის“ საქართველოს წარმომადგენლობის, შპს „აკას“-ს იმ დივიდენდებზე, რომლის 20% მაკა ასათიანს დავით ძოწენიძის სასარგებლოდ ჩამოერთვა.
უზენაესი სასამართლოს გადაწყვეტილებით, ძოწენიძეს „აკას“ 20% მიმდინარე წლის 12 თებერვალს გადაეცა.
ასათიანის ადვოკატი ამ საკითხის სტრასბურგის ევროპულ სასამართლოში გასაჩივრებას გეგმავს.