კონტროლის პალატის საქმიანობაში სახალხო დამცველმა არაერთი უფლებადარღვევის ფაქტი დააფიქსირა. ამის შესახებ ინფორმაციას ომბუდსმენის პრესსამსახური ავრცელებს.

აღნიშნულთან დაკავშირებით, სახალხო დამცველმა კონტროლის პალატას სისტემური რეკომენდაციები გაუგზავნა.

ომბუდსმენის აპარატში განმარტავენ, რომ რეკომენდაციებს სამომავლოდ უფლებადარღვევათა თავიდან ასაცილებლად პრევენციული ხასიათი უნდა ჰქონდეს.

ასევე, სახალხო დამცველი კონტროლის პალატას ურჩევს დაიწყოს დისციპლინური წარმოება იმ მოხელეთა მიმართ, რომელთა ქმედებებმაც კონკრეტულ შემთხვევებში მოქალაქეთა უფლებები დაარღვია.

როგორც „ნიუსპრესს“ სახალხო დამცველის აპარატიდან აცნობეს, ომბუდსმენმა 2012 წლის 15 მარტს საკუთარი ინიციატივით დაიწყო კონტროლის პალატის პარტიების ფინანსური მონიტორინგის სამსახურის მიერ, 2012 წლის მარტში მოქალაქეთათვის ახსნა-განმარტებების ჩამორთმევის დროს შესაძლო უფლებადარღვევათა ფაქტების შესწავლა.საქმის განხილვა დღეს დასრულდა, ხოლო შესაბამისი რეკომენდაციები და წინადადებები კონტროლის პალატას გადაეგზავნა.

„სახალხო დამცველის მიერ დაფიქსირდა არაერთი კონკრეტული უფლებადარღვევის ფაქტი, რომელთა ნაწილი განპირობებულია საკანონმდებლო ბაზის არასისტემატიზირებულობით, ხოლო ნაწილი უშუალოდ მოხელეთა კანონსაწინააღმდეგო ქცევით“- აცხადებენ ომბუდსმენის აპარატში.