პოლიციის ყოფილ მაღალჩინოსან თამაზ თამაზაშვილს სასამართლომ დღეს 3 წლითა და 6 თვით თავისუფლების აღკვეთა მიუსაჯა.
როგორც „ნიუსპრესს“ თამაზაშვილის ადვოკატმა ლილი გელაშვილმა განუცხადა, დღევანდელ სხდომაზე კამათის ეტაპი გაიმართა, სადაც დაცვის მხარემ დასკვნითი სიტყვა წარმოთქვა.
მისი თქმით, დასკვნით სიტყვაში ბრალდებულის მიმართ გამამართლებელი განაჩენის გამოტანა მოითხოვეს.
„თამაზაშვილს განაჩენი სისხლის სამართლის კოდექსის 236-ე მუხლის I და ამავე მუხლის II ნაწილით გამოუტანეს. პირველ ნაწილში მოსამართლემ მას 6 თვე, ხოლო მე-2 ნაწილით 3 წელი მიუსაჯა. მიუხედავად იმისა, რომ ეს იყო მინიმუმები, რაც შეიძლებოდა ამ მუხლების სასანქციო ნაწილში მისჯილიყო, თუმცა ჩვენ ვთვლით, რომ სასამართლო განაჩენი უსამართლოა“ - განაცხადა ადვოკატმა.
მისივე თქმით, დაცვის მხარემ საქმეში არსებული ყველა მტკიცებულების უგულვებელყოფა მოახდინა.
„აქ ორი მომენტია, ან გაყალბებულია საგამოძიებო მოქმედებების ოქმები გამომძიებლების მხრიდან ან იგივე გამომძიებლებმა, რომლებიც სასამართლოს ჩვენებას აძლევდნენ, ცრუ ჩვენება მისცეს. ორივე ქმედება სისხლის სამართლის კანონმდებლობით დასჯადია, ამიტომ, ჩვენ მასზე რეაგირებას მოვითხოვთ“ - განაცხადა ლილი გელაშილმა.
ადვოკატის თქმით, თამაზაშვილის მიმართ გამოტანილი სასამართლოს გადაწყვეტილება გასაჩივრდება.
თამაზ თამაზაშვილი სამართალდამცავებმა საკუთარ საცხოვრებელ სახლთან 2011 წლის 11 ოქტომბერს დააკავეს და ბრალად ცეცხლსასროლი იარაღის უკანონოდ შეძენა-შენახვა-ტარება წაუყენეს. დაცვის მხარე თამაზაშვილის დაკავებას „ქართული ოცნების“ საინიციატივო ჯგუფის წევრის, მისი სიძის ირაკლი ღარიბაშვილის პოლიტიკურ აქტივობას უკავშირებს.