პოლიციის ყოფილი მაღალჩინოსნის თამაზ თამაზაშვილის საქმეზე მორიგი სასამართლო სხდომა დღეს გაიმართება.
როგორც „ნიუსპრესს“ ბრალდებულის ადვოკატმა ნინო გელაშვილმა განუცხადა, დღევანდელ სხდომაზე კამათის ეტაპი დაიწყება.
„კამათის ეტაპზე პროკურორი სიტყვით გამოვა და ბრალდებულის შესახებ არგუმენტებს წარადგენს. თუ დაცვის მხარე საპასუხოდ მზად ვიქნებით, ჩვენს არგუმენტებს წარვადგენთ“ - განაცხადა ადვოკატმა.
თამაზაშვილის საქმეზე 11 აპრილს გამართულ სხდომაზე ნივთმტკიცების გამოკვლევის ეტაპი გაიმართა.
ადვოკატის თქმით, პროცესზე ბრალმდებელმა მხარემ საქმეში არსებული მტკიცებულებების - ავტომატური ცეცხლსასროლი იარაღისა და ხელყუმბარის დემონსტრირება მოახდინა.
მისი განმარტებით, აღნიშნული სხდომით სასამართლო გამოძიების ეტაპი დასრულდა.
თამაზ თამაზაშვილი სამართალდამცავებმა საკუთარ საცხოვრებელ სახლთან 2011 წლის 11 ოქტომბერს დააკავეს და ბრალად ცეცხლსასროლი იარაღის უკანონოდ შეძენა-შენახვა-ტარება წაუყენეს. დაცვის მხარე თამაზაშვილის დაკავებას "ქართული ოცნების" საინიციატივო ჯგუფის წევრის, მისი სიძის ირაკლი ღარიბაშვილის პოლიტიკურ აქტივობას უკავშირებს.