შინაგან საქმეთა სამინისტროს გურიის სამმართველოს თანამშრომლებმა, დიდი ოდენობით ფულადი თანხების თაღლითურად მითვისების ფაქტზე, ,,ლიბერთი ბანკის" ჩოხატაურის რაიონის ფილიალის მოლარე-ოპერატორი ვალერი გიორგაძე დააკავეს.
შსს-ს ინფორმაციით, გამოძიებით დადგინდა, რომ ბრალდებული სამსახურეობრივი მდგომარეობის გამოყენებით უკანონოდ სარგებლობდა ბანკის სხვა უფლებამოსილი თანამშრომლების ,,იუზერებითა'' და პაროლებით. იგი ფიზიკურ პირთა დაბლოკილი ანგარიშებიდან ბლოკებს ხსნიდა და ანგარიშების მფლობელების შეცვლას ახდენდა, რის შედეგადაც ანგარიშის ჩანაწერში შესული ნებისმიერი ოპერატორი ან ბანკის სხვა თანამშრომელი ანგარიშების მფლობელებად მის მიერ შეტანილი ცვლილებების შედეგად მითითებულ პიროვნებას ხედავდნენ.
ამის შემდეგ გიორგაძეს მის მიერ გაყალბებული ხელმოწერებით გამოწერილი გასავლის ორდერებით სალაროდან თანხები გაჰქონდა და ითვისებდა. ჯამში მის მიერ სამსახურეობრივი მდგომარეობის გამოყენებით უკანონოდ 99 საბანკო ოპერაცია შესრულდა და ამ გზით 2010 და 2011 წლებში თალითურად მიითვისა 41 045.75 ლარი და 1 078 აშშ დოლარი.
იგი საქართველოს სისხლის სამართლის კოდექსის 180-ე მუხლის მე-3 ნაწილის „ბ" ქვეპუნქტით გათვალისწინებული დანაშაულისთვის დააკავეს, რაც ექვსიდან ცხრა წლამდე თავისუფლების აღკვეთას ითვალისწინებს.