სასჯელაღსრულებისა და პრობაციის სამინისტროს ინიციატივითა და გაერო-ს ქალთა ორგანიზაციისა და გაერო-ს ბავშვთა ფონდის ხელშეწყობით სამუშაო შეხვედრა გაიმართა.

სასჯელაღსრულებისა სამინისტროს განცხადებით, შეხვედრის ძირითად მიზანს სასჯელაღსრულებისა და პრობაციის სამინისტროს 2015-2017 წლების საერთო სამოქმედო გეგმაში ქალთა და არასრულწლოვნებთან დაკავშირებული საკითხების სათანადო ასახვა წარმოადგენდა.

ღონისძიებაში მონაწილეობა სამინისტროს ერთიან სამომავლო სტრატეგიაზე პასუხისმგებელი მუდმივმოქმედი სამუშაო ჯგუფის წევრებმა, გაერო-ს ქალთა ორგანიზაციის, გაერო-ს ბავშვთა ფონდისა და არასამთავრობო ორგანიზაციის „ციხის საერთაშორისო რეფორმა“ წარმომადგენლებმა მიიღეს. შეხვედრაში, აგრეთვე, სასჯელაღსრულებისა და პრობაციის სასწავლო ცენტრის ხელმძღვანელი მაია ხასია, სასჯელაღსრულების N5 (ქალთა) დაწესებულების დირექტორი და სასჯელაღსრულების N11 (არასრულწლოვანთა) დაწესებულების დირექტორის მოადგილე მონაწილეობდნენ.

განხილვას სასჯელაღსრულების მინისტრის მოადგილე ეკატერინე ქრისტესაშვილი თავმჯდომარეობდა.

სამუშაო შეხვედრაზე სტრატეგიებისა და სამოქმედო გეგმების მომზადების მეთოდოლოგია, გენდერულ საჭიროებებზე დაფუძნებული ბიუჯეტის შედგენის თავისებურებები, „ციხის საერთაშორისო რეფორმის“ მიერ მსჯავრდებულ და პრობაციონერ ქალთა გამოკითხვის შედეგად შემუშავებული კვლევის რეკომენდაციები წარადგინეს.

კანონთან კონფლიქტში მყოფ არასრულწლოვნებთან და ქალებთან დაკავშირებული საკითხების ძირეულად განხილვის შემდეგ, ორდღიანი მუშაობის შედეგად 2015-2017 წლების სამუშაო გეგმის არასრულწლოვანთა და ქალთა ქვეთავების პროექტები შემუშავდა, რომელთა შემდგომი დახვეწა უახლოეს მომავალში ყველა შესაბამისი არასამთავრობო და საერთაშორისო ორგანიზაციების ჩართულობით მოხდება.