საქართველოს კომუნიკაციების ეროვნული კომისია „გლობალ TV“-ის ბრალდებებს უსაფუძვლოს უწოდებს.

კომისიაში აცხადებენ, რომ ბრალდებები იმასთან დაკავშირებით, რომ თითქოს კომისია ცდილობს „გლობალ TV“-ს ბაზრიდან გაძევებას და ამ ფაქტის დამადასტურებლად კომისიის მიერ არხ „THT“-ის რეტრანსლაციისგან თავის შეკავების ფაქტი მოჰყავს, საფუძველს მოკლებულია.

როგორც „ნიუსპრესს“ საქართველოს კომუნიკაციების ეროვნული კომისიიდან აცნობეს, კომისიამ არხ „THT“-ს რეტრანსლირებისგან თავის შეკავება მაუწყებლობის ტრანზიტზე ავტორიზებულ ყველა იმ პირს მოსთხოვა, რომელებიც საკუთარი საკაბელო ქსელით აღნიშნული არხის რეტრანსლირებას ახორციელებენ, რადგან კომისიაში „THT“-ს საქართველოს ტერიტორიაზე რეტრანსლირების მართლზომიერების საკითხის შესწავლა მიმდინარეობს.

„მიუხედავად კომისიის არაერთგზის კანონიერი მოთხოვნისა კომისიაში თავად საკაბელო ოპერატორების, მათ შორის „გლობალTV“–ის მიერ, დღემდე არ არის წარმოდგენილი ამ არხის საქართველოს ტერიტორიაზე მართლზომიერად გავრცელების დამადასტურებელი დოკუმენტაცია“ -აცხადებენ კომუნიკაციების ეროვნულ კომისიაში.

მათივე ინფორმაციით, კომისიაში შესულია შპს „მაგთიკომის“ წერილი, რომლითაც კომპანია კომისიას ატყობინებს, რომ მისი მცდელობის მიუხედავად კომპანიამ არხ „THT“-ის რეტრანსლირების ნებართვა ვერ მოიპოვა, რადგან არსებული ინფორმაციით, არხ „THT“-ს საქართველოში მოღვაწე ავტორიზებული პირებისთვის არ აქვს გადაცემული საკუთარი მაუწყებლობის საქართველოს ტერიტორიაზე გაავრცელების უფლება.

კომისიის ცნობით, ამავე წერილით შპს „მაგთიკომი“ კომისიისგან მონიტორინგის განხორციელებას ითხოვს, თუ რამდენად მართლზომიერად აქვთ განთავსებული თავინთ ქსელში სხვა საკაბელო ოპერატორებს აღნიშნული სამაუწყებლო არხი.

დღეს გამართულ პრესკონფერენციაზე "გლობალ TV"-ის იურიდიული დეპარტამენტის უფროსმა, ნატალია გელაძემ განაცხადა, რომ ტელევიზიის სამაუწყებლო ბადესთან დაკავშირებით კომუნიკაციის მარეგულირებელმა ეროვნულმა კომისიამ აქტი შეადგინა, რასაც საკაბელო კომპანიის წარმომადგენლები უკანონოდ მიიჩნევენ.

მარკეტინგის დირექტორის განცხადებით, ზეწოლის მიუხედავად, „Global TV” მაინც აგრძელებს მაუწყებლობას და სამაუწყებლო პაკეტს აუმჯობესებს.