პრეზიდენტმა არასრულწლოვანთა დანაშაულის პრევენციის სტრატეგია დაამტკიცა.
სტრატეგიის მიზანი ერთიანი ეროვნული პრევენციული პოლიტიკის ჩამოყალიბება,  არასრულწლოვანთა დანაშაულის შემცირება და სამართალდამრღვევ არასრულწლოვანთა რეაბილიტაციაა.

"არასრულწლოვანთა დანაშაული რთული ფენომენია, მას მრავალი გამომწვევი მიზეზი აქვს. არასრულწლოვანთა დანაშაულის წინააღმდეგ ბრძოლა საჭიროებს კომპლექსურ მიდგომას, სამთავრობო, არასამთავრობო და კერძო სექტორის, აგრეთვე საერთაშორისო ორგანიზაციების ერთიან ძალისხმევას", – ნათქვამია სტრატეგიაში.

დანაშაულის ჩადენის მიზეზების შემცირება ისეთ სოციალურ ფაქტორებზე მუშაობას გულისხმობს, როგორიცაა სიღარიბე, უმუშევრობა, საცხოვრებელი ადგილის არქონა, განათლების დაბალი დონე, სოციალური იზოლაცია და სხვა.

არასრულწლოვანთა დანაშაულის პრევენციის სტრატეგიის მიხედვით, არასრულწლოვნისათვის თავისუფლების აღკვეთა უკიდურესი ზომა უნდა იყოს, თუმცა, ზოგჯერ თავისუფლების აღკვეთის დაწესებულებაში მოთავსება გარდაუვალი აუცილებლობაა. ამ მიზნით, არასრულწლოვანთა პატიმრობის, თავისუფლების აღკვეთის დაწესებულებაში დაინერგა ინდივიდუალური მიდგომები.

სასჯელის მოხდის ინდივიდუალური გეგმა შესაბამის დაწესებულებაში ყოფნის პერიოდში უზრუნველყოფს არასრულწლოვანის განათლებას, საჭირო უნარ-ჩვევების ჩამოყალიბებას და საჭიროების შემთხვევაში, სამედიცინო-ფსიქოლოგიურ დახმარებას.