სამოქალაქო მოძრაობა "სოლიდარობა უკანონო პატიმრებს" სასჯელაღსრულების სამინისტროს პატიმარ გიორგი კვიციანის უფლებების დაცვისკენ მოუწოდებს.  
აღნიშნულთან დაკავშირებით სამოქალაქო მოძრაობა სპეციალურ განცხადებას ავრცელებს.
"სამოქალაქო მოძრაობის ოფისში დღეს რუსთავის #6 საპყრობილეში მყოფმა პატიმარმა გიორგი კვიციანმა დარეკა და შეგვატყობინა, რომ მასზე ხორციელდება ზეწოლა, რადგან მთავარი პროკურორის და სახალხო დამცველის სახელზე საჩივარი აქვს გაგზავნილი. გიორგი კვიციანმა აღნიშნა, რომ ამჟამად იგი ნაწამები არ არის, თუმცა, იგივე მიზეზის გამო, გარკვეული ხნის წინ ციხის სამკურნალო დაწესებულებაში აწამეს" - ნათქვამია განცხადებაში.
სამოქალაქო მოძრაობის "სოლიდარობა უკანონო პატიმრებს" ინფორმაციით პატიმარი მასზე შესაძლო ანგარიშსწორებას არ გამორიცხავს და აღნიშნავს, რომ თვითდაზიანებას ან თვითმკვლელობას არ აპირებს.
სამოქალაქო მოძრაობა სასჯელარსრულების სამინისტროს აღნიშნულ ფაქტზე დაუყოვნებლივი რეაგირებისკენ მოუწოდებს.