ამერიკის შეერთებული შტატების სახაზინო დეპარტამენტის მიერ ტრანსნაციონალური ორგანიზებული დაჯგუფებების წევრების ახალი სია გამოქვეყნდა, სადაც ოფიციალურად, „საძმო წრის" (The Brothers' Circle) კრიმინალური ორგანიზაციის წევრობის სტატუსი, ცნობილ ავტორიტეტს ზაქრო კალაშოვს მიენიჭა.

ინფორმაციას ამის შესახებ შინაგან საქმეთა სამინისტრო ავრცელებს.

აშშ-ს სახაზინო დეპარტამენტის ცნობით, ზაქრო კალაშოვი „საძმო წრის" ერთ-ერთი ყველაზე გავლენიანი წევრია. იგი ევრაზიის ორგანიზებულ-დანაშაულებრივი დაჯგუფების ცნობილი წარმომადგენელია და ახლო ურთიერთობა აქვს ლაშა შუშანაშვილთან, რომელსაც „საძმო წრის" სიის წევრობა, 2012 წლის 6 ივნისს მიენიჭა.

ზაქრო კალაშოვს ბრალად ედება ევრაზიის კრიმინალური დაჯგუფებისთვის ფულადი სახსრების მობილიზება, ფულის გათეთრება და იარაღისა და ნარკოტიკების უკანონო ბრუნვაში მონაწილეობის მიღება.

„საქართველოს შინაგან საქმეთა სამინისტრო მიესალმება ამერიკის შეერთებული შტატების უახლეს ეკონომიკურ სანქციებს, საერთაშორისო დანაშაულებრივი დაჯგუფებების წევრი პირების წინააღმდეგ.

ამასთან, ქართული მხარე აცხადებს მზადყოფნას, მომავალშიც შეიტანოს წვლილი ტრანსნაციონალური ტერორისტული ორგანიზაციების წინააღმდეგ ბრძოლაში, მათ შორის, სხვადასხვა ქვეყნებთან, განსაკუთრებით კი, სტრატეგიულ პარტნიორებთან მჭიდრო თანამშრომლობის გზით“ - ნათქვამია შსს-ს განცხადებაში.