სასტუმროში „რედისონში“, სასჯელაღსრულების, პრობაციისა და იურიდიული დახმარების საკითხთა სამინისტროს ხელმძღვანელობამ, გაეროს ადამიანის უფლებათა დაცვის უმაღლესი კომისრის წარმომადგენლობის მხარდაჭერით, მედიასთან შეხვედრა გამართა.

სასჯელაღსრულების სამინისტროს პრეს-სამსახურის ინფორმაციით, ბოლო წლების განმავლობაში საზოგადოება სასჯელაღსრულების სისტემაში ჯანმრთელობის დაცვის შესახებ ძირითადად ნეგატიურ ინფორმაციას იღებდა. ამიტომ, მინისტრის დავალებით სამინისტროს გუნდმა მოახდინა არსებული ვითარების შეფასება და შეიმუშავა სასჯელაღსრულების სისტემაში ჯანდაცვის რეფორმის ახალი გეგმა, რომელიც სამოქალაქო ჯანდაცვასთან ექვივალენტურ სტანდარტს, წარმატებული გამოცდილების გაზიარებას, რესურსების გონივრულ გამოყენებას, ხარჯთეფექტურობას, ადამიანის უფლებათა დაცვას და ინოვაციების შემოტანას უზრუნველყოფს.

შეხვედრაზე სამინისტროს წარმომადგენლებმა ჟურნალისტებს არსებული პრობლემები, ბოლო პერიოდში შესრულებული სამუშაო და სამომავლო გეგმები გააცნეს.