სასჯელაღსრულების პრობაციისა და იურიდიული დახმარების საკითხთა სამინისტროს ორგანიზებით,

დღეს სასტუმრო „ჰოლიდეი ინში“, ადგილობრივ და საერთაშორისო არასამთავრობო ორგანიზაციების წარმომადგენლებთან შეხვედრა თემაზე - „პენიტენციური სისტემის 2013 წლის პრიორიტეტები“ გაიმართა.
სასჯელაღსრულების დეპარტამენტის თავჯდომარემ, მაია ხასიამ, სტუმრებს სისტემაში განხორციელებული ცვლილებები და სამომავლო გეგმები გააცნო.
მისი ინფორმაციით, სასჯელაღსრულების სისტემაში ძირითადად ხელმძღვანელი რგოლი შეიცვალა. სულ კი, 1 ოქტომბრის შემდეგ, სამსახურიდან 155 თანამშრომელი გათავისუფლდა.
ამავე პერიოდში, დარღვევების გამოძიების შედეგად, პირადი შემადგენლობის ინსპექციის დასკვნის საფუძველზე, გათავისუფლებულია 21 თანამშრომელი და 11-ს კი საყვედური გამოეცხადა.
სამინისტროს პრესსამსახურის ინფორმაციით, მათთვის პრიორიტეტს, შიდა მონიტორინგის სისტემის შექმნა და გაძლიერება წარმოადგენს. ასევე ხორციელდება დეპარტამენტის მონიტორინგის სამმართველოს რეფორმირება, რის გამოც მთელმა პერსონალმა გაიარა გადამზადების კურსები. მიმდინარეობს სოციალური სამსახურის რეორგანიზაცია და სტრუქტურული ცვლილება, ასევე მსჯავრდებულთათვის ფსიქოლოგიური და სამართლებრივი კონსულტაციები. დაწესებულებებს დაემატა ფსიქოლოგის და იურისტის საშტატო ერთეულები.
„2012 წლის ბოლოსთვის იგეგმება #11 არასრულწლოვანთა სპეციალური დაწესებულების მშენებლობის დასრულება და იქ მსჯავრდებულთა გადაყვანა. დასრულებულია და უახლოეს მომავალში გაიხსნება ახალი საცხოვრებელი კორპუსი ტუბერკულოზით დაავადებული მსჯავრდებულებისთვის. დაბა ლაითურში, მიმდინარეობს ახალი სასჯელაღსრულების დაწესებულების მშენებლობა, რის ბაზაზეც მოხდება ბათუმის #3 და ზუგდიდის #4 დაწესებულების დახურვა. მომზადებულია მემორანდუმის სამუშაო, ერთობლივი ვერსია, სამინისტროსა და საპატრიარქოს შორის, სისტემაში კაპელანის ინსტიტუტის დასანერგად“ - ნათქვამია სამინისტროს განცხადებაში.