შპს „ტაოს“ ხელმძღვანელის, ლევან თუმანიშვილის ჯანმრთელობის მდგომარეობასთან დაკავშირებით, ფინანსთა სამინისტროს საგამოძიებო სამსახური განცხადებას ავრცელებს.

„შპს „ტაო“ ს ხელმძღვამელი ლევან თუმანიშვილი გუშინ გვიან ღამით, თავის დაზღვევის  მიზნით და ახალციხის ადგილობრივი სამედიცინო პერსონალის რეკომენდაციით,  მოთავსებულ იქნა თბილისის მაღალი სამედიცინო ტექნოლოგიების ცენტრში,  სადაც მას ჩაუტარდა საფუძვლიანი სამედიცინო გამოკვლევა, მათ შორის თავის  ტვინის ტომოგრაფია. სამედიცინო გამოკვლევით არ დადასტურდა ადვოკატ მამუკა  მდინარაძის განცხადება, რომ ბრალდებულს აქვს დიაბეტი და აღენიშნება ასთმის ნიშნები.
გამოძიებას გააჩნია სამედიცინო გამოკვლევის შესაბამისი დასკვნა. აღსანიშნავია, რომ სანამ  განხორციელდებოდა ლევან თუმანიშვილის დაკავება, სამართალდამცავების ინიციატივით, ბრალდებულს, ახალციხის ადგილობრივმა სამედიცინო პერსონალმა კვალიფიციური  სამედიცინო შემოწმება ჩაუტარა. ექიმთა თქმით, თუმანიშვილს დიაბეტი არ დაუდასტურდა.
ასევე, შემოწმების დროს არ დაფიქსირებულა მაღალი წნევა. ამ მომენტისთვის ლევან
თუმანიშვილის ჯამრთელობის მდგომარეობა სტაბილურია და მიმდინარეობს მისი
ტრანსპორტირება თბილისიდან ახალციხის მიმართულებით სასამართლო პროცესში
მონაწილეობის მიზნით“ - ნათქვამია განცხადებაში.

შეგახსენებთ, რომ ლევან თუმანიშვილი საქართველოს ფინანსთა სამინისტროს საგამოძიებო სამსახურის თანამშრომლებმა, ხე ტყით სარგებლობის ლიცენზიით გათვალისწინებული პირობების შესრულების კანონიერების, ხე ბუჩქნარის უკანონოდ გაჩეხვისა და ყალბი საგადასახადო დოკუმენტების დამზადება გამოყენების ფაქტებზე დააკავეს.

გამოძიება საქართველოს სისხლის სამართლის კოდექსის 210 – ე მუხლის მეორე ნაწილით მიმდინარეობდა.

ბრალდებულს აღკვეთი ღონისძიება სასამართლომ დღეს უნდა შეუფარდოს.