სამტრედიის რაიონის პოლიციის ყოფილი უფროსის, ზვიად ობოლაძის დაკავებასთან დაკავშირებით, მთავარი პროკურატურა განცხადებას ავრცელებს.
პროკურატურის ინფორმაციით, ობოლაძეს ბრალად სამსახურებრივი უფლებამოსილების ძალადობით გადამეტება ედება, რამაც ფიზიკური პირის ინტერესის არსებითი დარღვევა გამოიწვია.
დანაშაული საქართველოს სსკ-ის 333-ე მუხლის მესამე ნაწილის „ბ" ქვეპუნქტითაა გათვალისწინებული, და ხუთიდან რვა წლამდე თავისუფლების აღკვეთას ითვალისწინებს.
„გამოძიებით დადგენილია, რომ 2012 წლის 19 აგვისტოს, დაახლოებით 12 საათისათვის, სამტრედიის რაიონული სამმართველოს უფროსი ზვიად ობოლაძე, შოთა კიღურაძის ოჯახში სტუმრად მყოფი ძმიშვილის - სერგო კიღურაძის დაკავების (წვრილმანი ხულიგნობისათვის ადმინისტრაციული წესით) მიზნით მივიდა სამტრედიის რაიონის დაბა კულაშში. ზვიად ობოლაძის მოთხოვნით მასთან ერთად მითითებულ მისამართზე შეიკრიბა სამტრედიის რაიონული სამმართველოს პირადი შემადგენლობის 12 თანამშრომელი, მითითებულ მისამართზე მისვლის შემდეგ, ზვიად ობოლაძე პოლიციის თანამშრომლებთან ერთად ავიდა შოთა კიღურაძის აივანზე, სადაც სერგო კიღურაძე, ნათესავებთან და მეზობლებთან ერთად დომინოს თამაშობდა. პიროვნების დადგენის შემდეგ, ზვიად ობოლაძემ სერგო კიღურაძეს განუცხადა, რომ იგი დაკავებული იყო და სცადა მისთვის ხელბორკილის დადება“ - ნათქვამია პროკურატურის განცხადებაში..
განცხადების თანახმადვე, სერგო კიღურაძის დაკავებას ნათესავების მხრიდან, რომელთათვის დაკავების სამართლებრივი საფუძველი უცნობი იყო, პროტესტი მოჰყვა. ოჯახის უფროსი შოთა კიღურაძე, მისი შვილი თეიმურაზ კიღურაძე და დიასახლისი მაია ახობაძე ცდილობდნენ ხელი შეეშალათ სერგო კიღურაძის ეზოდან გაყვანაში და პოლიციის მანქანაში ჩასმაში.
„აღნიშნულ პროცესში, ზვიად ობოლაძემ, რომელსაც „პოლიციის შესახებ" საქართველოს კანონის მე-10 და მე-11 მუხლები ანიჭებდნენ პროპორციულობისა და აუცილელობის პრინციპების გათვალისწინებით ფიზიკური იძულების გამოყენების შესაძლებლობას, გადაამეტა თავის სამსახურებრივ უფლებამოსილებას, რაც ჩაიდინა ძალადობით. კერძოდ დაკავებული სერგო კიღურაძის პოლიციის სამსახურებრივ მანქანაში ჩასმისას, ზვიად ობოლაძემ განზრახ ჩაარტყა ხელში მომარჯვებული ცეცხლსასროლი იარაღის ტარი მაია ახობაძეს სახეში.
დარტყმის შედეგად მაია ახობაძემ მიიღო ნაკლებად მძიმე ხარისხის დაზიანება. მოსტყდა ქვედა ყბის კბილები და მიიღო ტვინის შერყევა“ - აცხადებს მთავარი პროკურატურა.