„ახალგაზრდა ადვოკატების“ სასამართლო სხდომების მედიით გაშუქების ინიციატივაში და კანონპროექტში მეტი სიზუსტის შეტანას ითხოვენ.

არასამთავრობო ორგანიზაციის პოზიციით, წარმოდგენილმა საკანონმდებლო ინიციატივამ ჯეროვნად უნდა გადმოსცეს მედიის წარმომადგენელთა საქმიანობის ფარგლები სასამართლო სხდომაზე, რათა პროცესის მიმდინარეობისას არ მოხდეს მოსამართლის მუშაობის ხელშეშლა.

„კანონპროექტში აღნიშნულია, რომ „დაუშვებელია სასამართლოს მიერ დადგენილი წესით სასამართლოს შენობაში შესული პირებისთვის პირადი ნივთებისა, მათ შორის მობილური ტელეფონის, კომპიუტერის, ფოტო, კინო, ვიდეო ან აუდიო საშუალებების ჩამორთმევა“, თუმცა დაზუსტებას საჭიროებს, ასეთი ტექნიკური შესაძლებლობებით აღჭურვილ ჟურნალისტს აქვს თუ არა უფლება, მოსამართლის თანხმობის გარეშე, თავისუფლად მოახდინოს სასამართლო სხდომის გადაღება ან სასამართლო შენობაში აწარმოოს გადაღება თუ ტრანსლირება“ - ნათქვამია ახალგაზრდა ადვოკატების განცხადებაში.

გარდა ამისა, „ახალგაზრდა ადვოკატების“ თქმით, ისინი მნიშვნელოვან წინადადებად განიხილავენ საზოგადოებრივი მაუწყებლის უფლებამოსილებას, შეუზღუდავად განახორციელოს სასამართლო პროცესის გადაღება, ჩაწერა და ტრანსლირება, ასევე ვალდებულებას უზრუნველყოს ჩანაწერის გადაცემა მასობრივი ინფორმაციის სხვა საშუალებებისათვის მოთხოვნისთანავე.

„მივიჩნევთ, რომ აღნიშნული მიდგომა, როგორც ზოგიერთი სამართლის სპეციალისტი აღნიშნავს, არ არის დისკრიმინაციული და სხვა არხებს დისკრიმინაციულ მდგომარეობაში არ ამყოფებს. პირიქით, მასობრივი ინფორმაციის სხვა საშუალებებსაც თანაბარი უფლება გააჩნია მოახდინოს პროცესის გადაღება და ჩაწერა, რა დროსაც სამართლიანია არხს დასაბუთებული ჰქონდეს კონკრეტული სხდომის მაღალი საზოგადოებრივი ინტერესი. მეტიც, გამოვდივართ ინიციატივით და პარლამენტს მივმართავთ, დაჩქარებული წესით მიიღოს ინიცირებული კანონპროექტი „აჭარის საზოგადოებრივი მაუწყებლის შესახებ,“ რა დროსაც, სასამართლო სხდომების გაშუქების თანაბარი უფლებამოსილება უნდა მიენიჭოს აჭარის ავტონომიაში აჭარის საზოგადოებრივ ტელევიზიასაც“ - აცხადებენ ახალგაზრდა ადვოკატები.