თბილისის იუსტიციის სახლს, დღეს აზერბაიჯანული დელეგაცია სტუმრობდა.
იუსტიციის სამინისტროს პრესსამსახურის ინფორმაციით, აზერბაიჯანის სახელმწიფო სერვისებისა და სოციალური ინოვაციების სააგენტოს წარმომადგენლები, იუსტიციის სახლის კონცეფციას გაეცნენ და თვითმომსახურების, სწრაფი და ხანგრძლივი მომსახურების სივრცეები დაათვალიერეს.
აზერბაიჯანის სახელმწიფო საქართველოდან იუსტიციის სახლის მოდელის იმპორტირებას გეგმავს. სპეციალურად ამ მიზნით ჩამოსული დელეგაციის წევრები კი, ერთ დღეს იუსტიციის სახლში გაატარებენ.
ქართველი სპაციალისტები აზერბაიჯანელ სტუმრებს იუსტიციის სახლების ფუნქციონირების სპეციფიკის, სერვისის პროცედურებისა და მისი ხანგრძლივობის შესახებ ესაუბრნენ.
პრეზენტაციებისა და სამუშაო შეხვედრების შემდეგ, სპეციალურად აზერბაიჯანული დელეგაციის წევრებისათვის იუსტიციის სახლში ტურიც მოწყო, რომლის დროსაც სააგენტოს წარმომადგენლებს საშუალება ჰქონდათ, თავად დაკვირვებოდნენ მომსახურების გაწევის პროცესს. სტუმრებმა თბილისის იუსტიციის სახლის ნოვაცია - JustCafe დაათვალიერეს, სადაც მომხმარებელს, საუზმის პარალელურად, მისთვის საჭირო დოკუმენტის შეკვეთის და, რამდენიმე წუთში, მისი მიღების შესაძლებლობაც ეძლევა.
იუსტიციის სახლი მსოფლიოს ერთ-ერთი ყველაზე პრესტიჟული ჯილდოს მფლობელია - 2012 წელს სახელმწიფო სერვისების გაუმჯობესებისათვის დაწესებულ ნომინაციაში ის გაერთიანებული ერების ორგანიზაციის გამარჯვებული გახდა.