შინაგან საქმეთა სამინისტრომ 2012 წლის საპარლამენტო არჩევნების გაყალბების მცდელობასთან დაკავშირებით მოქალაქე დააკავა.

შინაგან საქმეთა სამინისტროს ინფორმაციით, შიდა ქართლის სამხარეო მთავარი სამმართველოს კასპის რაიონული სამმართველოს თანამშრომლებმა, მიღებული ინფორმაციის საფუძველზე, 1981 წელს დაბადებული გიორგი მ. დააკავეს, რომელიც 2012 წლის პირველ ოქტომბერს, საქართველოს საპარლამენტო არჩევნების მიმდინარეობისას, კასპის 33-ე უბანზე, საარჩევნო ურნაში წინასწარ შემოხაზული, ყალბი ბიულეტინების ჩაყრას შეეცადა. დანაშაულის ჩადენის დროს, გიორგი მ. პირობითი მსჯავრის ქვეშ იმყოფებოდა. ის 2011 წელს ქურდობისთვის საქართველოს სისხლის სამართლის კოდექსის 177-ე მუხლით იყო გასამართლებული და ექვსწლიანი პირობითი სასჯელი ჰქონდა შეფარდებული.

შინაგან საქმეთა სამინისტროს ცნობით, საქმე საქართველოს სისხლის სამართლის კოდექსის 19-164-ე მესამე პრიმა მუხლითაა აღძრული, რაც ორ წლამდე თავისუფლების აღკვეთას ითვალისწინებს. მიმდინარეობს გამოძიება.