სამართალდამცავებმა ქალაქ ქუთაისში ჩატარებული საგამოძიებო და ოპერატიული ღონისძიებების შედეგად ოქროს ქურდობის ფაქტზე მოქალაქე დააკავეს.

შინაგან საქმეთა სამინისტროს პრესსამსახურის ინფორმაციით, ქუთაისის საქალაქო სამმართველოს პოლიციის მეორე განყოფილებაში, ხათუნა გელხვიიძის კუთვნილი ოქროს ნივთების ქურდობის ფაქტზე, გამოძიება სისხლის სამართლის კოდექსის 177-ე მუხლის მეორე ნაწილის ,,ა" ქვეპუნქტით დაიწყო. 11 დეკემბერს, ქუთაისში, თამარ მეფის ქუჩაზე, მაღაზია ,,საფილოსთან", ხათუნა გელხვიიძემ ავტომანქანიდან გადმოსვლის შემდეგ, კუთვნილი ოქროს ნივთები ვეღარ იპოვა.

სამინისტროს ინფორმაციითვე, ჩატარებული საგამოძიებო და ოპერატიული ღონისძიებების შედეგად, გაირკვა, რომ აღნიშნულ ნივთებს, დაკარგვის შემდეგ, 1985 წელს დაბადებული სულხან რ. დაეუფლა. ნაპოვნ ოქროულს ის სამუშაო ავტომანქანის სალონში ინახავდა, რომლის დათვალიერების შედეგადაც დაახლოებით, 350 გრამი 50 დასახელების სხვადასხვა ოქროს სამკაული ამოიღეს და პატრონს, ხათუნა გელხვიიძეს დაუბრუნეს.